【逆缘】陈家乐加入社署特别调查组　现实系负责帮社署查家宅？

无线剧集《逆缘》开始愈来愈有戏味，今晚嘅剧情就会讲到“香港队长”陈家乐获政府安排到社会福利署工作，喺特别调查组里面做文员，跟住高级特别调查主任林夏薇做嘢，加上有匿名人投诉姜大卫呃综援，相信之后好快两方面就有戏剧冲突。我谂大家都应该清楚社署主要系负责为弱势社群提供福利救助嘅政府，但系佢里面嘅特别调查组又系做啲咩，就应该唔系个个都知，所以今日都想为大家讲下呢样嘢。

其实社署嘅特别调查组系为咗防止市民欺诈同滥用社会福利而成立嘅，隶属社会保障科，而佢辖下五队就分别负责调查涉嫌诈骗嘅个案、追收有关个案款项、与各部门核对资料发现个案、覆检个案等工作。望落就好似好正义，好能够为纳税人嘅金钱把关。不过，为基层妇女工作多年嘅注册社工阿Bill就对特别调查组嘅成员有其他睇法：“佢哋其实唔系社工，而且当正政府嘅钱好似佢哋钱咁。”阿Bill话调查员总会闹到一班社会福利申请者狗血淋头：“好多人觉得综援好易拎，但其实好难，因为要过呢班人嘅一关，佢哋会好似查家宅咁起你底，过程当中佢哋嘅态度仲系好恶劣，要受佢百般奚落。”

谈到见过嘅个案，佢就话有几个都好深刻：“有一个单亲妈妈，因为个仔未够15岁，所以佢唔可以出去做嘢独留儿童在家，如果唔系就会犯法，被逼拎单亲综援。啲职员就会好恶咁质问佢，点解唔揾份高人工嘅工请个工人睇住个仔，又或者趁个仔返学时出去做Part-time，但其实呢啲都唔Work，一来好少公司咁Family-friendly就你凑仔时间，二来做Part-time喺香港系维持唔到生活。”又指有关部门不时派漏援助金。

唔好以为呢个情况情况只会发生喺综援身上，根据阿Bill嘅讲法，好多申请伤残津贴嘅弱势人士，即使揸住医生纸证明佢已经丧失工作能力，但系都会受到刁难：“有啲个案系Mental Health方面有问题，外表睇落冇咩事，例如有人群恐惧症咁，但相关职员都会用言语攻击你，好似盘问你、审讯你咁。所以呢啲个案要申请援助时，最好有个社工傍住，啲职员就冇咁寸。”

至于特别调查组系点样查人呃综援，阿Bill就话：“主要系睇你拎综援时有冇打工，如果有打工，就要倒还，有受助人做散工赚咗三旧水，佢哋都会就呢三旧水问到你X街，变相令班弱势人士长期处于贫穷状态。”问会唔会觉得呢班职员离地，甚至有啲迂腐？佢就咁答：“不如咁讲，佢哋其实系奉命行事，处事里面冇咩人性、人情味，好似机器咁。”唔知陈家乐、林夏薇嘅演绎，同阿Bill嘅亲身经历争几远呢？

除咗陈家乐入职，今晚都会有佢得知林夏薇有日本人血统，所以喺餐厅拂袖而去嘅场面：