【任噏乱评】最邪恶港产cult片《山狗》　变态情节挑战人类底线

讲到香港Cult片，好多人都会第一时间谂起《山狗》同《打蛇》呢两套80年代嘅电影，但对于比较年青嘅一代人，呢两出戏可以话系非常陌生。不过，就算隔咗几多年都好，呢啲喺香港电影新浪潮时期嘅戏依然都系好划时代，甚至比起好多依家嘅戏好睇得多。

早几日，我阿头当住我面放咗只DVD喺我台面，同我讲叫我揾晚收咗工抽时间喺屋企睇咗佢。我拎起只DVD睇，《山狗》？咩嚟？野生动物片呀？但睇清楚啲，就发现到DVD个封面设计得几令人不安，除咗有几个样样衰衰又面善嘅男人之外，仲有一个乸埋口面个样劲惨嘅女仔，而封面亦都有两行配字：“庄静而──银幕仅此一次的曝露”、“凶残本性，兽心人面”。之后睇埋封底，原来套戏系郑则仕、“大口青”王青有份做，咁都叫做有返啲平时见惯嘅人睇下，唔使个个都唔识。

封底个剧情简介就咁写嘅：“五名年青男女到郊外露营。众人大意把玲独自留下，逐被流氓轮奸，玲的哥哥为妹追凶，反遭杀害！玲受刺激而发疯。警方无证据起诉疑犯，玲父悲愤莫名，逐用自己的方法为子复仇……”咁刺激？所以之后我就真系有少少兴趣，仲上埋维基百科睇下相关资料打打底，原来呢套戏系喺1980年上画，系新浪潮时期嘅余允抗导演拍，当时好多人都狠批呢套戏好冷血暴力，而女主角庄静而虽然依家已经息影，但喺80、90年代好出名好红咁，做佢阿哥嘅艾迪亦拎过金马影帝，之后就慢慢了解到原来以前香港影业唔似依家好似就死就死咁，喺80、90年代真系好风光、好百花齐放，咩题材都有，亦拍得好够姜。

其实大家只要google一下，都会见到网上有唔少关于《山狗》呢套戏嘅评论，但怕影响咗睇呢套戏嘅感受，所以都一一跳过唔睇。终于有一晚，小弟冲完凉冲定茶坐定定用咗个半钟睇咗呢套戏，自问大胆、接受能力高，喺睇嘅时候真系有几下淆一淆。当中最心寒嘅一定系“荷兰佬”王青、“高佬”邝佐辉、“蛇佬”关鉴铭、“矮脚虎”同斋睇唔做嘅“病甩毛”郑则仕呢五只“山狗”，喺山涧度轮奸“阿玲”庄静而呢一幕。

呢幕一开始，“矮脚虎”笠住个牛头骨喺水池弹出，吓到刚刚洗完碗嘅庄静而不断尖叫兼逃走，而“矮脚虎”同邝佐辉就好似马骝跑跑跳跳咁边叫嚣边追住佢，搞到庄静而跣脚跌落水变落汤鸡。带队嘅王青本身都话玩够喇想拉队走，点知见到庄静而湿身透点劲性感，就忍唔住同班兄弟夹手夹脚揿低庄静而，夹硬除佢衫除佢裤，而呢个镜头除咗有露毛场面，亦都有露点嘅特写，但最深刻嘅始终都系庄静而不断挣扎嘅痛苦神情，至于历劫后的庄静而大字型软摊喺山涧巨石嘅画面，到艾迪抱住裸体嘅庄静而不断叫“阿妹、阿妹”都系好入心。

我觉得呢一幕真系好痴线，唔单只系意识上嘅痴线，仲系处理手法上劲得好痴线。画面入脑不在话下，配乐都系令人紧张，喺山涧嘅场面中，导演同负责为电影配乐嘅泰迪罗宾就用咗低沉而密集嘅音乐制造一种烦躁感，同山涧急速而喧闹嘅流水声合二为一，令观众更加代入庄静而嘅处境，用感受呢份自己处身喺大自然，自己一个人面对住猛兽嘅无助感。即使我系男性，同埋隔住个Mon，我都觉得成件事系好心寒。而导演同剪接师亦加插咗同一时间艾迪同钟保罗喺营地里热血掘地，以及同行嘅一Pair小情侣喺田间风流快活，反衬出庄静而经历嘅恐怖。

其实呢套电影都有好多令人不寒而栗嘅画面，但制造呢啲画面嘅唔系𠮶五只“山狗”，而系饰演庄静而老窦嘅陈星。经历个女被奸、个仔被杀嘅陈星用咗啲唔系常人谂到嘅方法虐杀“山狗”，第一个死嘅人就系“矮脚虎”，陈星就喺森林度扎好个营引佢嚟，“矮脚虎”偷闻女人底裤后就谂住入营再强奸另一个女人，点知一踩入去个帐幕度只脚就中咗捕兽器，之后陈星就趁机乱刀斩死佢。最令人震撼嘅系邝佐辉嘅死法，陈星一早就整咗个类似血滴子嘅木箱，里面有大量铁钉，当邝佐辉中伏被倒吊起时，陈星就拎咗个木箱出嚟放正喺邝佐辉下面，然后就放绳等邝佐辉兜头直插落木箱，痛到佢不断叫自己嘅同伴杀咗佢。

“蛇佬”关鉴铭嘅死法虽然唔特别，纯粹系畀陈星赤手空掌打死，但系佢死后嘅画面就真系好癫。故事嘅尾段，王青同郑则仕发现到“蛇佬”条尸时，就见佢被倒吊喺横梁上但条裤就好似郁郁下咁，王青就拉一拉“蛇佬”条裤，点知一大堆蛇同血跌哂落嚟，吓到王青即刻脚软坐咗喺楼梯。而最最最后，唔识游水嘅王青就畀陈星拉咗个水，郑则仕放绳落水谂住救佢时，陈星就将条绳绑喺王青条颈度，郑则仕用尽吃奶嘅食想拉王青上水，点知就系因为咁监生勒死咗王青。

虽然电影前面庄静而、艾迪游山玩水嘅画面好似有啲冗长，套戏开始咗半个钟先发生五只“山狗”轮奸庄静而呢件事，但系成套戏嚟讲真系几划时代，就算以今时今日嘅角色嚟睇都唔会觉得Out，最起码喺陈星为子复仇嘅部分系拍得相当清脆利落，依家好多电影都去唔到呢个水平。同埋，庄静而嘅演技真系好犀利，除咗上面已经讲过嘅佢被轮奸呢一幕，佢喺医院里面不断刷牙刷到流牙血后，又用牙刷刷马桶，再放落口系咁刷呢个画面，可以话系有今生冇来世，佢带住泪光嘅空洞眼神，完全系可能令到陈星之后近乎变态嘅行为合理化。其实讲返起呢套戏，即使上映已经系38年前嘅事，但有份演出嘅郑则仕依家回想起都话好深刻，有几幕仲系永世难忘。