古巨基大爆TVB第一份粮得＄3500 许文轩：我多你一倍
撰文： 冼燕珊
出版：更新：
古巨基近排为咗宣传红馆演唱会，频频现身TVB，继上次上《流行经典50年》、又客串《爱·回家之开心速递》，再上埋《东张西望》做主持，今次正常啲，上Big Big Channel接受主持许文轩(Edmond)嘅你问我答环节，其间谈到初出茅庐嘅工作经验，仲大爆喺TVB出嘅第一份粮系几多钱人工添！
基仔话佢第一份工系货车跟车工人，当时佢只系一个中三学生，父母想佢体验吓社会工作，所以安排佢去舅父公司度帮手送货，至于送咩货呢？基仔就话系送尿片，佢讲起呢件往事，觉得系一件好特别嘅经历：“感觉好新鲜，因为读书嘅生活圈子只系朋友，打工可以正式同大人做嘢，当时最期待嘅就系有无贴士。”
毕业之后基仔加入TVB，佢话好记得TVB出畀佢嘅第一份粮，“我仲好记得，系3500蚊。”许文轩听到都忍唔住倒抽一口凉气，基仔问返佢转头：“你第一份粮几多钱？”许文轩话佢第一份正式出嘅粮都系TVB出畀佢嘅，讲出嚟都唔系多基仔好多，“多你一倍，6500蚊。”基仔听到即刻摆个无奈样出嚟。不过基仔解释返，其实当时系读住艺员训练班逗呢份，所以都算开心嘅，其实进修有粮出都算系咁。许文轩其后接受访问，话当年$6500系试用价，之后TVB都有加佢人工。