【六十分钟时事杂志】杀人放火金腰带？　坐德国监好过住香港㓥房

做人真系唔好同人比较，因为比较之后得出嚟嘅结果往往都会令到我哋灰到喊唔出。最近美国节目《六十分钟时事杂志》（60 Minutes）就播出“Behind Bars”（铁窗之后）呢个特辑，而呢一集亦有喺明珠台播出，其中一个话题就系讲德国监狱，睇完之后真系有啲觉得喺德国坐监好过喺香港帮地产商供一世楼。

节目里面有一位囚犯叫约格梅伯克（Joerg Muehlbach），因为运毒同藏械而入狱嘅佢就坐监坐得好叹，佢系住喺一间好似大学宿舍单人房嘅独立囚室，里面嘅生活设备一应俱全之余仲可以打机，基本上真系可以足不出户，简直系宅男嘅理想生活。不过，佢闲时都会“出街”掟下飞镖、打下排球，又或者参加绘画班、陶艺班。而另一个囚犯叫贝德约根（Bernd Junge），杀过人嘅佢坐监都坐得好有“Work-life Balance”，到星期六日就可以出去监狱同屋企人共聚天伦，过下写意人生。至于点解可以咁叹？原因系德国等欧洲国家，唔着重惩罚犯过事嘅人，而系想佢哋之后可以变返个正常人，而有75%被判无期徒刑嘅囚犯，坐够廿年或以下就可以保释。

仲有一位囚犯叫基斯谭拿（Chris Templiner），佢喺节目里面净系肯讲自己犯过“非常严重嘅罪行”，估计都离唔开杀人放火，而相关官员亦觉得佢仲系好危险，所以坐咗廿年监都未知几时可以假释。主持人问佢系咪预计到自己会喺监仓到终老，佢就答“或者系”。至于佢个监仓系点？可以话系成间Apartment咁，对比起香港差唔多有21万人住嘅㓥房，真系好好多。

其实间唔中都会见到人喺啲讨论区翻兜欧洲啲监狱有几好住，就好似挪威某啲监狱成间酒店咁，伴侣嚟探监时仲会安排间两人房畀佢哋“短聚”。好多嘢都系睇完就算，唔好羡慕咁多，李嘉诚退咗休唔代表李泽钜话畀你知听日唔使返工，所以下个月奇妙电视播映张可颐、刘美君套《来生不做香港人》真系好应景。