奇妙电视播港视剧　《来生不做香港人》4月中“再”出街

有“魔童”之称嘅王维基曾经大搞香港电视网络（HKTV），落重本拍摄《选战》、《警界线》、《导火新闻线》和《恶毒老人同盟》等多套剧集，令好多观众都大赞题材新鲜又拍得好睇，但好可惜HKTV申请极免费电视牌照都申请唔到，搞到被逼停止制作电视节目兼转型做电子商贸。之前HKTV一口气放哂拍落嘅剧集上YouTube畀香港观众睇，但之后又转做海外观众先睇得，搞到好多人想睇都睇唔到。唔紧要，因为HKTV其中一套剧《来生不做香港人》四月十七日就喺奇妙77台播放。

其实《来生不做香港人》系几好睇，唔单止有张可颐同刘美君做女主角，仲有“舞台剧王子”潘灿良、曾伟权、龚慈恩和艾威等人脚，再加上本身个故事系围绕住内地同香港嘅价值同文化差异，就算事隔三年再重温都唔觉得老土。继之前揾咗王喜做创作总监，奇妙电视依家又打算播HKTV嘅剧，似乎好似真系准备有所搞作咁。

对于播HKTV嘅剧，奇妙电视就咁回复嘅：“奇妙电视将于四月中旬开始播放香港电视之制作，让观众于免费频道欣赏有关节目。奇妙电视致力为观众搜罗高质素节目。作为本港免费电视，奇妙电视鼓励业界发展，让观众欣赏多元化精彩节目，提供免费娱乐真‧选择。”至于其他仲会唔会有其他HKTV剧等住播出？奇妙电视方面就冇直接答，净系话仲会有其他节目制作播出。