【万千星辉．任噏乱评】赛果算正路 但《夸世代》凭咩拎最佳剧集
《万千星辉颁奖典礼2017》终于颁完，以前好多人话TVB颁奖礼无公信力，啲奖乱咁派，所以睇唔睇都罢。不过今次TVB似乎好识做，好多受到观众欢迎的剧集、人物都有奖拎。最紧要嘅系，无线两套重头台庆剧《夸世代》同《溏心风暴3》都在颁奖礼上触礁，《夸世代》只有“最佳剧集”奖，而《溏心风暴3》更加系一个奖都无，呢个真系势都估唔到，虽然话两套剧收视都唔高，不过TVB今次真系够胆唔俾奖台庆剧，抵赞！
赛前呼声十分之高的两位男艺员－王浩信和马国明，分别夺得视帝和“我最喜爱电视男角色”，佢两个拎奖相信都无人会觉得唔公平。而女艺人方面，唐诗咏首度封为视后，赛前大热嘅佢，拎到呢个奖都算正常，至于“我最喜爱电视女角色”则由蔡思贝爆冷夺得，因为赛前其实都无乜人会估佢有奖拎，仲有李佳芯喺度嘛。至于“最佳男配角”由陈山聪拎都系正路，话晒佢喺星、马都已经拎过奖，“最佳女配角”由朱晨丽小小爆冷争赢朱千雪和姚子羚，不过颁俾佢又绝对唔算唔公平，始终她近年做戏愈来愈好，又有观众缘。麦美恩拎“飞跃进步女艺员”绝对系实至名归，即使唔系戏剧组，但大家睇佢做主持都好开心。“飞跃进步男艺员”由杨明夺得，其实睇佢做咁多年剧，今年喺《心理追凶 Mind Hunter》扮一个有社交障碍的角色做得相当好，俾个奖佢都好合理。
其实最想讲嘅都系《夸世代》拎“最佳剧集”，在过往的历史，无拎过其他奖项但拎到“最佳剧集”就只有《天与地》和《女人唔易做》。其实《女人唔易做》在当年收视系全年最高，而且马明都有拎到“飞跃进步男艺员”，至于《天与地》更加唔使讲，当年被网民捧到去极点，拎到奖绝不为奇。但系《夸世代》呢？佢喺之前完全无拎过任何奖，收视亦未高过《同盟》，可能最尾有点跟风《天与地》想讲香港未来的情况，但系最后又戴晒头盔，完全无声音可讨论，咁究竟佢凭咩可以拎“最佳剧集”？
【万千星辉】汪明荃爆seed讲艺员心声：加人工、山头文化少啲