【任噏乱评．溏心风暴】网上盗睇唔系收视差借口　TVB几时认输？

《溏心风暴3》一星期一次的成绩表又出炉，收视一直都相当平稳，有21.1点。播了5个星期，头4星期的收视分别是22.2、21.5、21.4和21.5，真系好平稳，好平稳地低。为着呢个低收视，无线都已经有不少人出来撑场解释，第一是因为大陆有首播版本，大家好多时都上网用盗版方法去睇《溏心风暴3》，统计唔到呢班观众，收视咪差咗啰！

不过呢个讲法其实相当可笑，上年其实无线都同大陆有不少合拍制作，例如《踩过界》和《使徒行者2》，呢两套剧集的平均收视都要比《溏心风暴3》高，《踩过界》平均有22点，除了大陆先播，仲要香港放星期六日播。《使徒行者2》一开始已经高开，平均收25点，虽然之后有回落，不过仲可以保持住23点平均收视完场。除了合拍剧，早几个月无线直情买咗一套大陆已经一早播放完毕嘅《射雕英雄传》放喺8点半黄金时段，结果收视十分之好，平均有24点，最高更收30点，你叫《溏心风暴3》情何以堪？当TVB还不停去为《溏3》护航，其实客观嘅数字已经大大力打咗佢几镬心口，当你仲要死撑嘅时候，唔及早瞓底认输，咁之后咪愈来愈痛啰！

明嘅！出咁多人力物力，高成本嘅重头台庆剧，无线一定唔想衰，就算衰咗都要揾借口死撑，不过咁样好咩？其实高层有无谂过不如认认真真咁正视自己嘅问题，如果出嚟同大家讲：“其实今次我哋真系估计错误，以为头两辑咁收得，大家都会继续钟意睇。唔紧要喇，我哋会接受观众嘅意见，唔再拍第四辑㗎喇！”咁咪可以大方得体，又赢得到观众嘅欢心，呢啲咪一个公关嘅重要性啰。你要死撑，唔肯认自己捉错路，啲观众咪一路继续闹，话你守旧，话你套路一成不变，仲要咁啱上一套系口碑大好嘅《降魔的》，个对比系几咁大呀？不如都系停一停，谂一谂，睇吓点样同大家解释今次收视仆直嘅结果喇。