【任噏乱评．溏心风暴3】一套脱节嘅剧集　不如揾农夫Do姐拍剧喇

《溏心风暴3》收视一直保持平稳，平稳地差！当然地，总会有一大堆原因和理由为它护航，例如大陆先播、偷步抢睇、年尾无力、太多竞争等等，总之你噏得出的理由都会出现。不过今次想讲，《溏3》收视如此不济，主要归于一个原因，就系唔能够掌握时势，唔识与时并进。

时期回溯去返2007年，《溏心风暴》新鲜滚热辣出炉，当时平均收视去到40点，最高有成48点，风头可谓一时无两。下年，《溏心风暴之家好月圆》食住道势，再创高峰，平均收视高达47点，最高50点，是TVB最高收视的几套剧之一。当然两套都咁爆系有原因，一来题材少拍，二来撞正龚如心争产案，社会议题纷纷围绕著陈振聪如何争产，食正这个大方向，收视好的确是可以预期的。

问题来了，现在已经2017年，相隔接近十年后再次推出《溏3》，TVB高层更加是严阵以待，要知道当年的收视神话当然已经不可再破，不过都不能差得不堪入目。可惜，到现时做了25集，一半有多，收视平均只得22左右，系差，仲要系好差！相信TVB高层都搲晒头，明明是重本制作，明明是星光熠熠，明明头两辑咁劲，点解今次会搞成咁？答案好简单，文中初段讲到，系“时势”，唔好以为加几句潮语，由一家争产变成两家争产，得闲请吓小凤姐，就以为自己与时并进。系真㗎，他们真的是这样以为，以前夏雨在接受其他传媒访问时表示过，今次剧集加了许多潮语，年青人一定受落。司棋姐在接受《香港01》访问时也自豪地表示，今次唔再玩金句改玩潮语，系睇得出成个剧组都觉得有潮语就可以跟上时代的步伐，你话好唔好笑？

小甜甜争产案已经远成历史，《溏心风暴》的任务理应在当年就可以完结，今时今日仲要拎出嚟继续争产，睇一班离地嘅人喺度嘈来嘈去，香港人还会喜欢睇吗？点解《降魔的》、《不懂撤娇的女人》这些剧集咁受欢迎？因为佢贴地呀嘛，《同盟》起码都叫有动作睇吓，《超时空男臣》摆明轻松搞笑，连《夸世代》对撼《溏3》都一样照赢！仲谂住食老本，题材都唔谂，加潮语就叫与时并进？世界无咁著数嘅事㗎！

演员依然继续用四大长老去把持，黄宗泽唔好咩？在《幕后玩家》中的角色其实也差不多，一样大受欢迎。王浩信唔好咩？《不懂撤娇的女人》和《踩过界》叫好叫绝。陈敏之唔好咩？在《溏3》角色入戏最好就系佢。点解呢一堆人去到呢套剧就无晒反应？俾个意见TVB，除了题材要转，演员都要食住个时势，唔系话四大长老唔好，不过角色套套都一模一样咁济，你唔烦我都闷喇。或者下次揾班后生嘅当家去争产，效果又会唔同，又或者不如直接揾农夫加Do姐拍套剧，食住佢哋而家嘅“时势”，收视一定爆！