【成勋专访】圣诞节病住孤单过 《焦急的罗曼史》后有揾宋枝恩？
2017年除夕，韩剧《焦急的罗曼史》嘅车本部长成勋就奉献咗自己嘅第一次嚟到香港同大家倒数，迎接2018！不过当日成勋就唔系咁好彩，因为佢搭嚟香港嘅飞机竟然延误，搞到本身已经感冒嘅成勋一落机就要准备接受传媒访问。幸好成勋接受《HK01》访问时完全不见倦容，非常专业！
摄影：陈顺祯 鸣谢：上水广场
想不到成勋真人同《焦急的罗曼史》嘅佢都一样咁好笑，当《HK01》记者问本部长2017的圣诞节点过时？成勋第一时间竟然系问返记者转头：“我做咗啲咩呢？啊！等等先，我要谂一谂…”过咗一阵成勋先话：“我圣诞节病咗，就咁喺屋企过咋！宜家都未病好晒，仲有少少感冒。”《HK01》记者再追问成勋如果有得休息会想去边度放松时，卖口乖嘅成勋就话：“我想嚟香港玩啊！所以我今次完咗倒数嘅行程会留喺香港玩多2日先走。”仲话呢个系粉丝都知道嘅“秘密”！唔知有冇粉丝喺香港野生捕获到成勋呢？毕竟今次系成勋出道7年以嚟第一次嚟香港，梗系要玩够、食够先返韩国继续开工拍《心里的声音2》啦！
有留意开成勋Instagram嘅粉丝都会知道佢成日都会上载机场图，《HK01》问到成勋对于机场fashion会点样特别打扮时？成勋又搞笑回应：“我嘅服装师会帮我打点！”不过成勋个人就钟意舒适为主，好似运动服装，只要着得舒服就可以喇！之后又再讲到成勋宜家嘅发型比起《焦急的罗曼史》短，原来本部长就钟意宜家短发多啲，佢唔钟意染发、电发，总之一切都系要以舒适为主！
半年前成勋曾经出演过韩国综艺《我独自生活》，当时嘅预告片令粉丝好震惊咁话：“成勋喺屋企同出街嘅形象差太远喇，好似大叔咁！不过都系成勋嘅反转魅力嚟嘅！”《HK01》记者将呢翻话转告畀成勋听时，佢好率直咁承认：“其实唔系似大叔，而系我嘅年龄根本就系大叔，我宜家唔后生喇！”《HK01》记者就相信粉丝一定唔会咁谂，正所谓男人三十一枝花，更何况36岁嘅成勋仲因为《焦急的罗曼史》圈咗好多妹妹饭添！
成勋广东话祝《HK01》读者，2018新年快乐
下载《香港01》App，更多韩星靓相、影片率先睇！
iOS：http://bit.ly/hk01app-iOS-download
Android：http://bit.ly/hk01app-Android-download
我哋01韩迷嘅facebook专页Kpop 01已经开咗喇！想知道更多韩国娱乐、饮食、玩乐、时尚资讯，快啲去畀like啦：https://www.facebook.com/hk01.kpop/