戴耀明照顾妈咪拒北漂　御用傻仔最紧张母亲：佢想等到我攞奖

戴耀明在亚视、无线挨足25年，终于在内地发围，在爱奇艺拍电影、电视剧，收入亦好过无线几倍，不少网友都为排长上位而高兴，但人们不禁要问，既然在国内吃得开，为何还要留在无线呢？除了因为戴耀明视无线为娘家外，最重要是不舍得79岁妈妈一个人在香港，他说：“自己都谂唔到喺大陆有机会，亦有国内经理人话不如签俾佢，留喺大陆长期发展啦，但我最后都冇，因为都想多啲时间陪阿妈，试过有次喺大陆拍紧嘢，我女朋友话我听“你阿妈疴血㖞！”我即刻打俾佢，佢仲话冇嘢㖞，好小事，我话阿妈疴血都真系唔小事㖞，佢好怕阻到我返工，仲叫我唔好落返香港，我梗系落返嚟啦，虽然𠮶次系肠胃敏感啫，但𠮶次我就喺到谂，如果真系签上面，真系成年喺大陆，得返新年一两个星期先落返嚟㖞，咁阿妈点呢？谂过都系继续喺无线，有啲十几日上大陆嘅工作就接啰。”

戴耀明在无线多演谐角，但戴妈妈一直很支持他，每次看无线剧集，都期待看到儿子的演出，他说：“我阿妈喺电视见到我会即刻打嚟㗎，喂，又见到你㖞，几好呀，几搅笑，但当见我做啲坏人呢，佢就话𠮶啲唔好呀，教坏人呀，佢太入戏喇，哈哈，有时佢话希望自己长命百岁啦，等你攞奖，返到屋企都有人恭喜下你嘛，唉，都知达成呢个心愿好渺茫，佢成日讲埋呢啲笑嘅，又好担心我，未成家立室....”戴耀明当然明白无线游戏规则，但亦知妈妈出于一片关心，所以他对妈妈说了一个多年的“大话”，他说：“我同佢讲攞咗奖𠮶啲好忙㗎，如果我攞咗，边有时间陪妳呀？唔攞奖仲好呀，揾钱实际啲，我每年都同佢讲，出年俾个孙你代替个奖啦，但我呃咗佢好多年..都整唔到个孙俾佢。”

戴耀明最为人熟悉的角色一定是《鐡马寻桥》的排长，到现在网友说起这名字都自然想起他，但其实拍摄《鐡》剧时，是他的人生最低潮，他说：“𠮶阵应该系拍《鐡马寻桥》，爸爸亦系身体最差嘅时间，医生都话佢...唔会挨得好耐喇，有一场戏讲我被师傅King sir闹我冇鬼用，生嚿叉烧好过生你，𠮶场明明唔驶喊㗎，但我唔知点解忍唔住喊出嚟，但导演又拍咗㖞，咁出咗街之后都有啲反应啦，咁就系大家成日讲嘅排长喇，老豆都支持我嘅，但就冇阿妈咁出面啦，始终老豆传统啲，感情就收得埋少少，但做仔系知嘅。爸爸走咗之后，我情绪好低落，觉得人生好多嘢都好快走呀，𠮶阵有少少抑郁，我有睇心理医生，好彩唔驶食药。亦唔好话有咩低潮，因为我一直都冇高潮过，哈哈，而家最紧张妈妈啦，佢系我永远第一个分享嘅人，”