【叶文辉专访】曾被禁做跳唱歌手　啤梨：我幻想过帮麦浚龙伴舞

DJ和歌手，好像有种密不可分的关系，在电台仍是大众不可或缺的年代中，不少知名歌手就如林忆莲其实也是当DJ出身。在旁人眼中，DJ歌手似是一个具有优势的身份，可以自己播自己歌，透过大气为自己拉人气，又具有人脉关系，拍剧也容易找到好角色。不过任职电台20年的啤梨叶文辉却道：“DJ歌手我谂系全香港最难做嘅一个歌手。”
摄影：陈顺祯

先跟大家回顾一下，啤梨任职新城电台一段日子后，2002年正式签约正东唱片歌手，当时双线并行，起初可谓如鱼得水。歌手身份出道首年，第一张唱片已非常幸福，获得演唱《I Believe》的机会，这首韩国电影《我的野蛮女友》的主题曲，深信广东乐迷不会陌生，因为这首歌几乎足够让啤梨出骚唱足20年。

提起当年得到翻唱《I Believe》广东话版的机会，啤梨似乎比我们想像中来得冷静：“2002年啱啱出道，好突然有呢个唱歌嘅机会，好突然就话要录《I Believe》，好快就派出街，因为要配合当时电影宣传。而当年嘅啤梨仲系一旧饭，首歌唔系我拣嘅，我只系睇咗一次《我的野蛮女友》嘅首映，全智贤都有嚟，我净系记得佢好靓。睇完首映已经觉得首主题曲好好听，然后公司同我讲我有得唱，真系好兴奋。所以首歌并唔系我自己盘算要攞返嚟唱，因为以前做歌手唔可以有思想，公司会帮我思考晒。”

虽然《I Believe》得到乐迷的认可，传唱度无容置疑，不过这首大热作品却从未得过任何大奖，啤梨道：“《I Believe》当年攞嘅系歌曲奖，严格嚟讲算系一个细奖，当然我都好感恩。不过呢样就系我话DJ歌手难做嘅地方，自己电台反而会避讳，就等于阿爸阿妈做评判，唔通佢次次都比100分个仔？咁佢点同其他人交代呢？所以我从来都冇攞过男歌手奖，而当全世界人都有好多奖，我喺𠮶个台度工作，攞到其中一个细奖，你谂下我会听到咩声音？”

因为DJ身份，其他友台不会帮啤梨plug歌，播歌机会也是微乎其微，而其他电台会颁奖予他，更是一个天荒夜谈：“最初我都有期待，不过慢慢谂通咗，我喺呢个家庭成长，我冇可能喺其他家庭攞奖。反而有啲友台嘅DJ曾经揾过我做访问，我会好记得，呢一世都记得。”

即将于9月12日举行入行20周年演唱会，啤梨表示希望一尝心愿，满足一下当跳唱歌手的愿望：“其实出道嘅时候，我好想做一个跳唱歌手，心中团火烧得好旺，不过亦被旧公司淋熄。有留意我嘅歌，会发现啲歌几乎系连beat都冇，鼓声都尽量收埋。虽然未算好唔开心，但我好想有一个机会，好幸运当时歌手仲有得出大碟，公司为咗满足我心深处嘅跳舞底子，于是讲到明做一首快歌，不过唔会plug。当时我好天真，觉得你唔plug我都总有机会表演，但枉我为一个DJ，其实我应该好清楚，唔plug又边有机会攞出嚟呢？又唔会拍MV，出骚又唔会唱，最后连舞步都冇排。”

啤梨又提到令他最深刻的一首快歌作品叫《原始》：“呢首歌系方大同作畀我，冇plug到。当时听到个Demo我已经有晒成个画面，谂好只舞点排，不过种种原因，最后份歌词同我最初谂嘅概念唔同，所以舞步都改变咗。但系其实呢首歌我都净系喺2006年嘅伊馆演唱会唱过一次，因为好难得有dancers，所以排到抽筋，之后都冇再唱过。”

啤梨出道当年，香港乐坛算是一个跳唱歌手的真空期，少不免导致公司为他度身的策略也偏向K歌：“𠮶时跳唱组合就多啲，EO2、E-Kids、Boy’z，唯一一个个人身份玩跳唱就系麦浚龙嘅《爱上杀手》，作为同期新人，其实我好羡慕佢，我直头幻想过，有机会的话帮佢伴舞都好呀。”

跳唱路走不成，唱片公司反而一直希望为啤梨找到第二首、第三首《I Believe》，他又道：“唔单止唱片公司想，连我身边嘅作曲人都想，因为佢哋想帮我突破到《I Believe》，做一首歌比《I Believe》更《I Believe》，不过奈何之后都好难再有一首超越到，可能系因为时势关系，又可能系个机遇问题。”这时候又问到他，知不知道自己在Youtube上最高点击的个人作品是哪一首？包括啤梨在内，深信每个人也会答是《I Believe》，不过实际上却是《没有童话》，听到这个答案，啤梨也惊喜道：“识货！其实当年录呢首歌，我系好大期望，因为仲算系早期作品。当时乐坛系要求有原创作品，如果你翻唱改编，啲人会觉得你差，偏偏我第一首红嘅歌就系翻唱作品。所以《没有童话》同《口不对心》两首歌都真系讲我自己嘅故事。”