黄子华开金口Rap金句 拍住古巨基唱《子华说》超洗脑
撰文： 黄浩晋
出版：更新：
“系咁㗎啦，好出奇啊？”、“揾食啫，犯法呀，我想㗎？”、“老板出俾你果份唔系粮，系赔偿”大家睇到呢几句系咪即刻有声先？
以上都系出自黄子华嘅金句，有名你叫“子华神”当然字字珠玑，一句就笃中你笑穴。净系听子华神斋讲都够晒过瘾，如果佢Rap埋出嚟你又点睇先？古巨基今日推出新歌《子华说》，除了邀请到子华神开金口，基仔当然有唱埋一份，真系一首歌满足晒你两个愿望。
子华神嘅金句涵盖各种题材，打工仔心声、港男港女爱情观、苦中作乐人生观样样齐，所以今次《子华说》节录咗上述各方面金句拼凑而成，每个段落主题鲜明，大家听起上嚟都易跟好多。加上《子华说》编曲非常groovy，切合子华神栋笃搞笑的风格，鼓beat同结他部份唔复杂，但节奏非常catchy一听就上脑。
真系够胆讲句，各位fans们去唱K歌词都唔使听，一起音乐就可以唱晒成首。如果到时基仔开骚请埋子华神上台合唱就好喇！