【万千星辉】成班艺员上台“咪嘴”？　夹硬度唱歌位其实唔讨好

TVB万千星辉颁奖典礼又点会净系颁奖礼咁简单啦，点都会有啲间场余庆节目，好彩今年冇啲打打闹闹嘅场面，多得Do姐同农夫lead住成晚气氛，令整晚“少少寸，多多趣”，整晚流都算顺畅。不过有样嘢真系谂唔明，点解间场要推班艺员出嚟唱歌呢？

要艺人出场唱歌唔系问题，但系明知有啲艺员唔识唱歌又要推佢揸咪出场，逼人咪嘴；甚至有艺员咪嘴都甩，你叫观众情何以堪呢？真系隔住个mon都feel𠮶种尴尬。

第一段歌唱表演系《不懂撒娇的女人》，一众艺员出场唱《陪着你走》，老实讲有睇剧集的话听到首歌自然谂起王浩信同唐诗咏嘅一段情，但唐诗咏个角色太港女喇，真系有种挡不住的反感。讲番段表演，明显就系靠王浩信同谭嘉仪carry啦，一来首歌系佢哋入录音室录；二来出街条声净系听到佢哋两个把声，游生袁文杰又明显系咪嘴，因为佢头一句口形错晒，仲尴尬失笑o添，真系戥佢尴尬。

相关文章

【万千星辉】石敢当大热！胡鸿钧《到此一游》夺最受欢迎剧集歌　

第二段歌唱表现由《降魔的》班底带俾大家，由蒋志光与胡鸿钧担大旗唱出《遥不可及》，相信大家之前喺YouTube睇过佢哋合唱都觉得冇得输。不过，奇怪嘅系马国明、何远东等人揸咪出场，支咪又冇声，何远东仲要七情上面咁咪嘴，实在佩服佢哋专业精神。

第三段歌唱表演到菊梓乔，Hana成为今年力谷嘅对象，多首洗脑剧集都由佢献声唱出，网络讨论区上面呼声都好高。Hana表现稳阵，水准稳定，不过略嫌“太稳阵”，姿体动作都有啲生硬。

再系咁，TVB只会洗唔甩“是是旦旦”嘅负评，希望来日TVB可以型番次啦。