ToNick九展开骚有兄弟撑场 Supper Moment：真系值得支持一世！
乐队ToNick昨晚在九展Star Hall举行《不停站演唱会》，首次踏足3000人场馆是他们的一大突破，难怪他们都感触话：“我哋卡咗喺1000人9年喇！”无论是因为《长相厮守》才留意ToNick的乐迷，或是资深乐迷都一样尽兴，皆因为ToNick不同年代都有玩，如：《穷》、《雪糕糯米糍》、《讲咩都错》、《张飞留比我》、《发你个梦》，到近期的《阿飞与阿基》、《回忆备份》等等一应俱全，满足乐迷不同口味。昨晚更邀请到Supper Moment作嘉宾，台上更播出7年前两队乐队合唱《最后晚餐》及《濑嘢》的片段，真系回忆返晒嚟。
原来呢条片已经7年喇！
日前ToNick与Supper Moment在十大中文金曲同台得奖，两队兄弟Band齐齐攞奖实在令人鼓舞。昨晚他们再度合体当然要crossover，将《异相》及《飞》两首歌完美融合，两位主音Sunny与恒仔在台又跑又跳，顿时炒热全场气氛，所有观众跟住拍子一齐跳，就算置身观众席最后排仍能感受到Star Hall“大地震”。去到最后一次副歌Sunny与恒仔兴奋得插水，台下乐迷当然自动波接到实。所以话，Band Show识睇嘅一定系睇Live，呢种气氛真系好难喺第二度揾到。
Sunny同恒仔high到插水！(黄国立摄)
合唱完《异相》x《飞》后，Supper Moment主音Sunny话：“如果你有一个朋友，令到你又喊又笑嘅，你要珍惜呢位朋友！如果你遇到一队乐队同样令到你又喊又笑嘅，真系值得支持一世！”之后仲讲到眼湿湿：“今日Supper Moment真系好开心可以喺呢个台……见到ToNick 10年走入Star Hall！”顿时欢呼声四起，然后Sunny一句：“送上呢首歌，返番去10年前！”接着唱出《最后晚餐》，一首陪众多乐迷走过不同阶段的作品。
如果有睇开ToNick的读者都知道，以往每次演唱会都有“重点环节”就是鼓手晨曦唱歌，之后他试过拿起结他唱《活着ViVa》，昨晚他翻唱黄贯中《Can't Bring Me Down》仲rap埋一份；晨曦更形容自己是“在沙漠行走的鱼”大放笑弹。
一个演唱会要有高低起伏先好睇，虽然ToNick大部歌曲都是热血，很冲的感觉，但也有柔情一面。他们以acoustic形式唱出《善忘哥》、《阿飞与阿基》、《你对我已经唔系好似以前咁》等等，更加入小提琴及钢琴元素令编曲更丰富。
来到Encore环节，终于听到《长相厮守》，恒仔跳落台走入观众席，相信有睇过《救僵清道夫》的乐迷脑海即刻泛起戏中不同场景，再配台上荧幕播放的动画，营造相当感人的气氛。感动过后到应节神曲《Last Christmas》，睇嚟好多乐迷都有“被走数”经验，全场都声嘶力竭大叫“还钱！还钱！”最后以他们的主题曲《T.O.N.I.C.K》划上句号，相信大家都会记得那句：“起码我做过！”
ToNick完骚后接受访问，早前Supper Moment透露过希望联同其他乐队合办类似音乐节的活动，那ToNick会否是其中一员？他们表示未知详情，但有机会一定会支持：“想当年搞一个学校巡回，Supper Moment都系义无反顾咁支持，到将来有好嘅活动点都要支持！”
首次踏足3000人的大场，ToNick 4人心情很激动：“呢个场地系我哋一路想开嘅场地，好多谢每一位买飞入场支持，我哋4个见到全场爆满真系好感动！”
《长相厮守》呼声很高，早前又得奖，会否对此有压力？恒仔话：“有压力嘅，但真系要keep住平常心去经历，因为完咗今晚接住都几场show，又要准备下年嘅歌，所以要keep住个状态系平静，再努力做。好多谢支持《长相厮守》嘅每一位！”小龟补充：“有奖项当然好啦，但系其实今年都有好多出色嘅音乐人出碟，我自己都有听，所以奖项就真系唔敢谂住，总之就系努力啦！”