《长相厮守》攞完奖系落力啲！　ToNick九展开骚全场跳到癫

乐队ToNick今日在九展Star Hall举行《不停站》演唱会，即使全场企位乐迷亦一样投入又唱又跳，一齐“玩到跳掣”。今年ToNick势头强劲，《长相厮守》一曲大受欢迎，更先拔头筹于十大中文金曲得奖；另外又入围叱咤我最喜爱歌曲最后10强喜事连连，难怪ToNick四人在台上表现更落力。

虽然《长相厮守》爆红，但ToNick照样有玩早期作品《穷》、《雪糕糯米糍》、《讲咩都错》、《濑嘢》、《What A Sunny Day》等等照顾乐迷需要。ToNick一向予人热血“咩都够胆死”的感觉，虽然演唱会到晚上8点50分才开始，比原定时间delay不少，但他们一出场便炒热全场气氛，主音恒仔大叫：“今晚唔好悭力同我哋玩尽佢呀！”乐迷当然交足反应边跳边高举摇滚手势，跳唔郁就跟住拍手，无论拍子几快几慢都跟到足，就连歌曲action位都冇甩，果然温晒书先入场。
 

一出场玩完《3ree》、《雪糕糯米糍》、《濑嘢》，恒仔本身打算介绍演唱会主题点知甩鞋带，鼓手晨曦即刻出声：“我谂住打救你哋，兄弟有难梗系要帮手！”听到呢到，真系要讲一句“系爱呀哈利！”唱到《穷》时，主音恒仔忍唔住插水，虽然佢叫乐迷送佢返上台，但乐迷一于少理，将恒仔送到观众席最尾。