E-kids进军东京下北泽　全靠Tommy靓老婆系红爆原宿系KOL

E-kids去年在旺角麦花臣开复出演唱会大收旺场，这队MK-Pop始祖食住个势，今年在乐坛不停有搞作。先前一口气推出两首新作《一二三四》及《咪谂》，可说是不怕大家笑，最怕大家唔睇。不过E-Kids刚刚在社交平台发怖消息，表示下年头再于麦花臣开骚，而演唱会Poster亦走向日系暴走族风格，咦？乜唔玩韩风啦咩？

早前日本人气组合w-inds来港开骚，同是三人组合的E-kids也有到场支持，更成功与w-inds集邮。咦？呢个桥段同早几年Tommy同GD合照有啲似曾相识㖞！不过跟车就唔好太贴，今次嘅合照唔系盲中中行埋去呃Like，就如Tommy也忍不著自白：“正当大家都追捧韩风嘅时候，其实我哋心入面嘅底蕴都仲系好钟意日本嘅音乐文化，而w-inds亦系我哋好欣赏嘅男子组合。正如当年E-Kids出道，我哋造型、曲风、跳舞都比人话同日本嘅组合好相似，当然评价有好有坏，有人话我哋抄日本，亦有人听听吓，觉得都几新鲜呀。所以之前我哋推出两只比较韩风嘅歌之后，嚟紧都会推出一首比较日系嘅歌曲，似返E-kids以前初出道嘅作品。而今次所有音乐其实都喺日本𠮶边做，包括编曲、混音、监制，《咪谂》嘅MV都系喺日本拍。”

Tommy嘅太太Eva原来喺日本好多Fans，不但经常飞去当地打碟演出。更加有唔同嘅品牌合作，连BAPE创办人Nigo、摄影大师米原康正都认识。

提到香港乐坛，既然E-kids在日本找到一扇门，而香港仍有很多乐迷抗拒他们的音乐作品，为何又要留恋这地？Tommy坦言：“其实香港人会否听广东歌这个文化，大家有目共睹。但自从有了网络之后，基本上也是世界大同。即使在香港发布歌曲，全球有兴趣的也会看到。但我坦白说，香港的文化是，除非你是天王巨星、或是很大的金钱投资，否则像我们这种艰难的歌手，音乐人不会用心帮你做歌，媒体也不会用心作报导。其实唔应该净系去保护好红嘅艺人，就算唔讲E-kids，香港都有好多值得帮的歌手，如果大家愿意去保护一下，留意一下，深信歌手都唔需要向外闯。入返正题，我哋E-kids亦都想证明，现今年代，我哋可以唔靠传统媒体帮忙，一样揾到自己嘅天空。尤其近几年，香港有好多独立歌手都可以做得好好，点解会出现咁多独立歌手，其实就系得唔到好大嘅支持。例如我哋最近出嘅新歌，其实喺传统媒体上系从来冇播过，一次都冇。反而网上嘅平台会制造一个空间比我哋，个问题就系，传统媒体系咪仲需要停留喺E-kids你哋形象唔好嘅位置呢？当市场仲停留咗喺2003年，我哋需要做嘅嘢唔系走去另一个市场，而系要正视呢个问题。等于杜汶泽都会问个DJ‘电台啲人咁怀旧嘅？问嚟问去都系𠮶个年代嘅嘢，好闷呀。’我哋其实一样面对紧呢个问题，最后索性大家唔好靠大家啦，变咗一个恶性循环，所以呢样嘢真系香港乐坛需要面对。”

Tommy亦补充：“网络世界主导一切，就像太太Eva可以在世界各地工作，全靠网络上找到认同她风格的受众。只要做出好的作品，一定会有人欣赏，不需依赖传统媒体，这是我近五年最深信的想法。所以E-kids也一直抱著这心态为自己打开不同市场。”