【任噏乐评】MC Jin 英文Rap系原罪 《中国有嘻哈》第4集出局？
《中国有嘻哈》节目一出街各方面备受质疑，唔单止被指抄袭韩国人气节目《Show Me The Money》，揾吴亦凡做评判畀人感觉“摆明想捧佢”；而且仲要揾佢嚟评MC Jin有冇资格入围，简直就同幼稚园生捉大学教授错字一样，话晒MC Jin以前都Rap赢黑人扬威过海外。
讲番转头，《中国有嘻哈》呢套“喜剧”日前推出第4集嘅预告，标题写住“嘻哈侠恐面临淘汰危机！？”，本身都以为系标题党啫，吓我唔到嘅！
点知睇埋内容就觉得唔对路，MC HotDog嫌MC Jin Rap太多英文，仲话：“英文真系的稍嫌多了一些，我真系的希望我们第一季出来的，不应该是英文那么多的！”听完MC HotDog咁讲，MC Jin都即刻拧晒头，一脸不屑咁向镜头挥手后就转身走人。
MC Jin呢集系咪真系被淘汰就未知住，但内地节目又因语言问题去否定参赛者就肯定系。
MC Jin前几集出场都系“三语广播”，广东话、英文、国语都出齐，始终“ABC系佢系佢”，英文咁拿手冇理由唔出招啦系咪？而且用无论边种语言MC Jin一样砌到Flow，歌词一样有态度；再者，能够自如地运用三种语言去Rap有几多参赛者做到先？
内地节目似乎都几“排外”，好似讲广东话就一定冇运行咁。早前谭淇淇参加《中国有嘻哈》就因为坚持Rap广东话而被叮走，喺节目闪现过几幕就唔见影。再者Rapper Al Rocco喺海选时候，表现惊人，声底十足黑人Rapper，以全英文词献技后，张震岳第一个反应系问佢：“Can You Speak Chinese？”MC HotDog都话：“可是整首英文。”最终Al Rocco都系被淘汰。
之前湖南卫视节目《我想和你唱2》入面，歌手麦贝夷被安排做“素人”都算喇，同内地参赛者斗唱广东话歌都输，就节目入面林子祥同韩磊力撑都冇用。
再讲远啲，2014年《中国好声音》第三季入面，乐队Killersoap主音陈乐基虽然凭《月半小夜曲》入围，但系到中段与张心杰“单挑”唱《光辉岁月》时，唱广东话嘅陈乐基就算有几靓声，演出有几稳定，唱得有几高音都系要输。唔系话要盲撑陈乐基，但系以事论事，从声底、音色控制、音域等等，都比只保持“摇滚唱腔”音色沙哑嘅张心杰优胜。
讲到尾，内地节目充满套路，一切都是套路。
陈乐基唱广东话版《光辉岁月》落败。