COLLAR演唱会｜Candy否认IG买Fans　芯駖爆成员轮住伤要每日放血

女团COLLAR一连三场的演唱会《COLLAR Crush Live 2024》今日（24日）于九龙湾国际展贸中心Star Hall举行尾场，沈贞巧（Gao）、王家晴（Candy）、许轶（Day）、苏雅琳（Ivy）、邱彦筒（Marf）、李芯駖（Sumling）和陈泳伽（Winka） 完骚后接受访问，Day和Marf难逃被追问恋情的命运（详见另稿），而其余成员亦有分享对整个演唱会的感受。

COLLAR演唱会｜Day担心Nathan轻生有关心对方　一原因冇继续发展

有一部分每位成员独唱慢歌，芯駖说是成员举手要求，因为觉得出道两年要有新尝试，虽然监制都帮大家拣啱歌，但她仍紧张到人都震，呼吸都有困难，而Gao更瞓捩颈。在演唱会后段爆喊的Gao，讲起感受时再次眼湿湿，她表示：“喊得咁犀利，因为觉得大家好叻，你咁样问我又想喊⋯⋯因为成个过程，其实好多人照顾我哋，好多前辈、唔同身边嘅团队，甚至乎系你哋，都系睇住我哋成长。”

COLLAR当初经《全民造星IV》选拔入行，决赛当晚的评判李嘉欣、谢安琪（Kay）都有捧场，芯駖说一下子回想起当晚的画面，说：“李嘉欣小姐我真系好意外，但系因为佢好有光芒，一眼就见到。（你邀请阿Kay？）我都有邀请，但系佢一早同我讲会嚟睇，仲录定Message叫我唔好紧张，佢都知我紧张，就话到时见。”

芯駖在台上讲起其实母亲两年来不知道她已成为了女团成员，直至早前剧集《法与情》出街才知道她是出道艺人，她说：“佢话有个朋友同佢讲喺电视见到我，就话原来你而家演戏。佢一路以为我教紧跳舞，唔系好想屋企人担心，佢一路叫我快啲揾个男人嫁咗佢。我一路都唔敢同佢讲，想自己比较稳定啲嘅时候先同佢讲，做呢一行始终都系好唔Stable，点知佢睇完《法与情》就知道咗，日日都睇。今日妈咪第一日嚟，我都唔敢望佢，一望佢就好想喊。”

今次彩排演唱会大家轮住伤，Candy最早扭伤，而芯駖则自称是“受伤之鬼”，指每日朝10晚11做体能训练，有一晚跳《OFF/ON》，要踢起脚，她兴奋到整亲腰，“成条腰瘫咗，接近临On Show嘅五日，返到屋企瞓唔到，瞓喺度又痛、趴喺度又痛，已经即时做按摩，第二日揾咗好多个医生，好彩我哋有Medical团队帮我哋急救，电疗、刮痧、冲击波、针灸、放血，我哋每一日都放血。”

被问有冇邀请已退团的前队友So Ching（苏芷晴）睇骚，Marf透露经理人有邀请，但冇成事，“好似系佢schedule唔得，但系我哋都有send埋Make a live嘅直播Link畀佢，我相信佢都有机会系同其他创作人同埋Wyman（黄伟文）佢哋一齐睇紧。”众人直认唱歌时不时想起对方，回忆起从第一日组团时的一切。

今次演唱会上，Candy成为“喊包一号”，头场喊到尾场，她说自己排舞时幻想到台下有很多灯牌的画面已经眼湿湿，觉得自己和Fans都等这一日等了很久，尤其唱到RubberBand的《未来见》其中一句时，更是十分感触。不过今日（25日）早上9点她便要回大学考试，笑说：“冇得担心，顶硬上！”谁知她被Ivy大爆：“你头先唔系咁讲，你头先又话放弃咗。”Candy即谓：“出席已经好好。”不过，早前Candy被指IG买Followers，当记者问是否“买粉”，她不明所以问：“买粉？”又解释：“我咁辛苦赚返嚟嘅钱，我要交学费，买米粉啰，买蒟蒻米粉，完全冇买粉。”芯駖则称，若买Fans应该不会买这么少。

今次不少人赞Ivy唱功有进步，被问到是否满意自己表现，她先说：“未知呀。”其他队友异口同声说很满意她，她随即谓：“虽然好少讲，但系我都好需要其他人嘅肯定，因为我Solo系尾二𠮶首，彩排嘅时候听到啲队员每一个都咁叻嘅时候，我都要努力做到我要做嘅嘢，喺屋企都会谂住佢哋去练𠮶首歌。”