COLLAR演唱会｜芯駖一番话赢尽掌声：终于知点解鲁生金生拣我

女团COLLAR一连三场的演唱会《COLLAR Crush Live 2024》今日（24日）于九龙湾国际展贸中心Star Hall举行尾场，沈贞巧（Gao）、王家晴（Candy）、许轶（Day）、苏雅琳（Ivy）、邱彦筒（Marf）、李芯駖（Sumling）和陈泳伽（Winka） 唱完串烧歌后，众人以“Hello！大家好！我哋系COLLAR！”与观众打招呼，之后逐个深情剖白。

Ivy、Marf多谢家人，而Candy发言时话秒变大喊包，她指嫲嫲、公公、婆婆都在场，爆喊说：“我由参加《造星》开始，我就等嫲嫲可以嚟睇我演唱会呢一日等咗好耐，仲有公公婆婆。多谢你哋平时咁早瞓都肯嚟依度喺我哋表演。”由于Candy公公经常将自己种植的农作物送给COLLAR成员，众女表示：“多谢Candy公公啲蕉同埋椰菜，仲有大树菠萝。”

而曾被指失言的Winka就谓：“我系好直白直接嘅人，成日都做错好多嘢，多谢你哋信任我同埋喺我隔篱，成日陪住我，听我嘅歌，畀我知道我唱嘅歌仲会有人听。多谢你哋入场支持我哋，呢个演唱会等咗两年，都真系唔容易！”之后芯駖说，母亲在台下，但今次竟是对方第一次睇芯駖表演，惊爆：“我妈咪从来都唔知我入咗行，直至《法与情》出咗街，所以今日佢系第一次睇我表演。”

其后她的一番话赢尽掌声，芯駖出道时已年届35岁，常因年龄被外间认为不适合入女团，她在台上表示：“终于都明点解鲁生（鲁庭晖）、金生（金广诚）同花姐（黄慧君）拣我入COLLAR，想我突破一啲框框，因为我觉得我存在嘅其中一个意义系，我想话畀好多朋友知，虽然我都唔系好叻，但系无论你3字头、4字头、5字头、6字头，100都好，都可以做自己，都可以靓，都可以有自信，都可以有选择！我会继续努力喺呢度做好我要做嘅嘢，同大家一齐。”观众随即掌声雷动，而队友Day等亦被感动落泪。

芯駖又眼湿湿直言很喜欢六位队友，说虽然大家常说“三个女人一个墟”，指女团不可能冇是非，但她强调COLLAR确实冇是非，队友从来不会争C位和独唱，也不会想赢对方，反而为其他团员能企C位感高兴，相当难得。

队长Gao负责做总结，她一开声已禁不住哭泣，称没想到可以在这里开演唱会，而且很多人从COLLAR出道第一天已一直陪伴，她剖白：“我唔系一个将啲情绪摆上面嘅人，大家都唔系好示弱嘅女仔，我哋唔会喺IG话畀大家听我哋好辛苦，或者唔会话畀大家听我哋有任何伤患，但系大家就系咁样挨过去，甚至我哋都唔会Bother大家。王家晴有整亲，芯駖有整亲，但系你见到佢哋仲系坚持嘅时候，你都会觉得自己唔可以停。我哋唔系好柔弱嘅女仔，希望大家既然大家有缘份喺呢个地方，呢个舞台相聚，希望大家钟意COLLAR嘅表演，亦多谢晒每位一直支持COLLAR嘅人。”鞠躬过后，7位就唱出最后一首歌《Chosen Family》。