陈奕迅新歌《放》科幻微电影 到底参考咗几多套科幻片？
呢个年代最有效嘅植入式宣传方法就系靠微电影，卖广告会拍微电影、拍MV又会拍到好似微电影、宣传新歌又会拍微电影，所以陈奕迅新歌《放》就一次过满足晒几个愿望，以新歌《放》为题拍咗套微电影，顺手帮客户“直入式”宣传。
今次呢套微电影开宗名义为啤酒品牌作宣传，更找来廖子妤及2016年全球排名首25位的DJ Alok于微电影中演出。话晒都系一套国际级水准嘅科幻微电影，所以就揾嚟荷里活影业巨头CAA主理，老老实实，虽然只系一个广告，但科幻感十足大制作。
但睇睇下，喂唔对路㖞，点解咁多场口都熟口熟面嘅？唔通荷里活级数嘅微电影，连啲人设场景都系直接参考返荷里活嘅大作嘅？先讲讲人物服饰方面，一开头会见到廖子妤一众未来世界嘅人类，著住一式一样嘅灰色服装，虽然喺呢度不得不赞廖子妤个样的确几有“未来”同“科幻”嘅味道，不过套衫就真系不期然令人谂起《饥饿游戏》同《分歧者》入面嘅角色造型。到底呢套灰色制服系参考咗几套科幻大作，定真系未来嘅大趋势呢？睇嚟我都应该入返几套灰色衫摆喺屋企，咁就够晒潮啦！
可能你会话，斋睇套衫就话人哋抄嘢都好唔公道啫，星战够系有啲军官著灰色军装啦，唔通其他科幻片又抄佢咩？好！又同大家睇吓微电影嘅其他细节，剧情讲到女主角廖子妤为咗避开追捕，走咗入一部升降机，而呢部升降机“啾”一声就将廖子妤带到去地球嘅另一侧，仲入咗间Club听DJ Alok打碟。嗱！问题就出喺部升降机度啦！唔知大家有无睇过2012年版嘅《Total Recall》(新宇宙威龙) ，入面正正就系有部“天梯”可以比人类穿越地心，去到地球另一边返工。而微电影当中廖子妤所搭嘅电梯，系同《Total Recall》部天梯几乎一样！不过老老实实，深信唔少睇过呢部电影嘅人都几钟意“天梯”嘅设计，而呢部“天梯”放返落去今次Eason嘅微电影当中，又的确系几合适嘅。