美国儿科医学院：医生处方自由玩│Sci Papa

暑期刚刚过去，你哋有冇同小朋友玩过够？
要答呢个问题，首先我哋要先定义乜嘢为止系“玩”先！可能会有人问笔者，“玩”都要定义？！但其实笔者相信，父母们对玩嘅定义真系可以大不同；去上跳舞兴趣班算唔算系玩？与同学仔来一场奥数大比拼又系唔系叫玩咗？咁星期日早上轻轻松松同爷爷嫲嫲饮餐茶呢？
实际上，就连美国儿科学院都认为——“玩”嘅定义系难以捉摸的！

有见及此，美国儿科学院在2018年8月发表咗一个详细报告，解释“玩”对小孩嘅重要性，并要求儿科医生要多提示家长畀小孩有足够嘅“真·玩”时间，美国儿科学院并建议，学前课程应通过游戏而唔系外在动机如考试成绩等，来促进孩子嘅内在动机，从而使佢哋真心喜欢学习新事物。

然而，呢份报告更指示儿科医生，要提醒父母多畀仔女自由玩；就好似叫医生去处方“玩”畀小孩一样，期望用“玩”呢种“药物”令佢哋健康成长。老实讲，“玩”都要医生叫，小孩才可以拥有，可悲不可悲？

有人话，成长于呢个年代嘅香港小孩，大部分都拥有丰富嘅物质生活，比以前嘅小孩幸福；但笔者就几回味自己个年代嘅童年生活，好少同学或朋友需要额外嘅补习、可以随时落街同屋村其他小朋友玩唔同嘅游戏；冇iPad但有好多朋友、冇好多玩具但有唔少玩伴；计我话，以童年来讲，我们嘅年代先系黄金童年嘅年代啊——至少唔驶医生叫，先至有得玩吖嘛！

参考资料：http://pediatrics.aappublications.org/content/early/2018/08/16/peds.2018-2058

Sci Papa （专页：Scientific Papa）

喜欢科学，但更喜欢老婆跟女儿。觉得科研跟“凑女”都是要有极度的耐性，不怕失败，还要懂得自我反思后用不同方法再尝试！将育儿及科学融合，期望伴著女儿走一条快乐的成长路。