美元一枝独秀　巴黎名店美国客爆买　鲍威尔应记一功｜珍姬蜜

香港放宽“0+3”后，唔少金融界朋友都即刻出行，皆因大家都话无眼睇港股，不如外游一下。小珍都唔执输，趁住欧元低水，去了一转巴黎。

到埗巴黎，以往喺香榭丽舍大道行两步就听到普通话嘅光景不复见，但唔代表街头冷清，反而比起疫情前更加热闹。名店，如Hermes、Chanel、Dior等简直系“人山人海”，动辄有几十人在门外排队。

原因无他，一来撞正巴黎时装周；二来无咗中国游客，取而代之多咗美国同其它欧洲旅客。自欧盟放宽旅游限制后，唔少欧洲人都出行，但出乎意料嘅系而家多咗唔少美国人！

鲍公“带挈” 美元欧游打八折

职业病上身，小珍shopping时都不忘向店员八卦，系咪因为时装周先至咁“墟冚”。店员笑笑口话，时装周呢个大活动固然吸引好多游客，但其实早喺今年6月，美国人已经开始多，直至9月可以“蜂涌而来”嚟形容，佢话对于8月呢啲传统淡季都咁多人，完全摸不着头脑。

如此盛况，要多谢鲍公，事关美国今年3月正式开展加息周期，美元愈战愈勇，年初至10月，欧元兑美元贬值15%，加埋退税，奢侈品起码打八折，不难理解美国人过嚟“爆买”！

香港大孖沙BESPOKE西装　十万起跳

除咗名店，小珍今次仲去了专门为名门贵族订制西装嘅Cifonelli。据悉新世界行政总裁郑志刚、恒地主席李家诚、大律师周国丰、新鸿基主席李成煌、仁爱堂副主席梅伟琛等等，都系佢客仔。

Cifonelli嘅西装除了cutting靓，用料亦系数一数二咁舒服。一套入门用上Loro Piana嘅丝同羊毛嘅西装，埋单盛惠10万港元。

以往Cifonelli每两年都会来港为客户提供服务，但因应疫情，已经好几年冇嚟香港。喺Cifonelli订造西装总共要度身三次先做到，小珍随即问道，疫情之下，客人咪好难造衫？裁缝Massimo都苦笑话冇办法，“而家趁亚洲放宽旅游限制，陆续开始约返客户度身。”

虽说港元同美元挂钩，强美元令港人欧游同样受惠。但正因如此，巴黎酒店涨价逾倍，四季酒店一晚房价盛惠14,000港元；米芝莲餐厅L'Ambroisie、L'Arpège就更加爆满。有意去欧洲嘅朋友最好早啲订酒店同餐厅，假如目的系“爆买”，更加要预留多两日去“全天候shopping”，以免唔够尽兴！