海产大王家族做生意零杠杆　历97赢到“做得唔绝”口碑｜珍姬蜜

内地房企债务问题没完没了，唔少高杠杆嘅内房发展商都愁眉不展，忙于扑水。小珍听啲内房老细讲，最近连股票嘅“Turn”（成交）都冇心机打，反正银行都唔会借钱。以前好景时，通街“平钱”，企业唔进取啲“对唔住自己”，但时移世易，经济前景唔好，又撞正加息周期，Cash点只系King，简直系God！

本港企业家早于97年亚洲金融风暴已获得唔少“教训”，自然对“杠杆”心存警惕，学诚哥话斋︰“稳健中不忘发展，发展中不忘稳健”。

“口碑系做得唔绝”

呢句话听落简单，最难是恪守。小珍早前见到新华集团主席兼全国政协常委蔡冠深，就好佩服佢地集团稳健作风──新华集团自1997年金融风暴后就唔再做杠杆，只用内部资金发展。

由海产大王蔡继有创办嘅新华，喺香港扎根超过半个世纪，最出名就梗系海产，但实情喺八十年代开始已喺港澳发展地产生意，其后将版图拓展至内地、越南、柬埔寨、温哥华等地。

生意愈做愈大，肯定有风浪。蔡冠深同小珍讲，新华喺九七金融风暴都受咗好大打击，“我哋以前有好多银行借钱，你知㗎啦，银行就按本子办事呀㗎嘛。𠮶阵银行Call loan，我哋唔能够话‘人哋唔还钱俾我，你唔好call我loan啦’。但人哋欠我哋𠮶笔呢，真系全部都还唔到。我哋唯有将啲物业按晒，然后攞嚟还俾银行，所以顶得好辛苦！”

面对咁多坏账，新华集团嘅处理手法居然系照单全收？蔡冠深话，“人哋欠我哋冇得还、收唔返，唯有自己啃晒。我哋可以告到佢破产，但系你告佢破产，唔等于你攞到佢钱㗎嘛，咁你何必做到咁绝呢？”蔡冠深笑言，新华嘅口碑唔单止系有借有还，仲有人情味，“我哋嘅口碑系做得唔绝！”

“我哋冇杠杆”

经此一役，新华明白到保守的重要性，“我哋以前好进取，后尾就好保守，你做到咪做！”保守一词，任你演译，小珍自然追问集团杠杆比率是多少，点知蔡冠深斩钉截铁话“冇！”，“我哋冇杠杆。如果有杠杆，我做大10倍都唔止啦，咁而家我都做到（咁大），何必去博呢？”

蔡家旗下唯一有上市的是金融业务 — 新华汇富金融（0188），今年4月收购拓立投资有限公司，总认购价2,400万元亦全由集团以现金支付。截至去年12月底，集团资产净值9.64亿元，现金及现金等价物1.99亿元。

“要卖就卖俾国企”

讲起新华汇富金融，小珍又回想起一个关于蔡家嘅故事。追溯至2014年，正值港股大时代，唔少中资都嚟香港证券行连壳一齐买，实行喺香港资本市场分一杯羹。当时，新华汇富亦系目标之一，唔少人同蔡家洽谈，原因无他，第一牌照齐全，第二冧巴靓，第三仲系香港老字号！不过，蔡冠深却好淡然咁话唔卖，原因系觉得卖壳形象唔好，以免外间有个“老牌家族卖壳系咪做唔掂”嘅谂法。

实情最大原因应该是蔡氏财政稳健，完全唔缺钱！小珍听啲金融界朋友讲，当时蔡冠深同细佬兼CEO蔡冠明讲，“如果要卖就要卖俾国企，钱唔系问题！”蔡家认为，钱唔系首要条件，反而卖予国企的话，做第二大股东都无所谓。如此霸气，足以证明新华财力雄厚，兼够爱国！