【每逢大事讲故事】哑忍野蛮Bibi八年 奥巴马卸任在即大振夫纲
又到年尾，又系人事变动嘅日子。虽然美国总统同飞云一样，都冇年尾花红同双粮，但奥巴马唔同嘅就系佢将会系1月离职。临近卸任，通常都系做又三十六，唔做又三十六，但奥巴马呢期就动作频频，最大嘅核弹，可谓系联合国议案表决中罕有同“野蛮女友”Bibi唱反调，就以色列殖民区问题投下弃权票，令联合国通过反对议案，要求以色列停止再起殖民区。
吓？边个Bibi？
Bibi，呢个名真系好港女，好港女呀⋯⋯据说呢个系以色列总理内塔尼亚胡（Benjamin Netanyahu）屋企人叫佢嘅乳名嚟嘅，不过依家连奥巴马同埋《纽约时报》都好钟意Bibi Bibi咁叫佢。
美国同以色列的爱恨情仇复杂到一个点，既然系咁，不如飞云就索性用港女同佢男友来讲解一下美以关系，等大家容易啲明白点解美国会系奥巴马卸任前几星期，突然投下弃权票，令联合国通过叫停以色列兴建殖民区嘅议案。
通过议案的一刻，全场拍掌……
要了解奥巴马同Bibi嘅关系，唔可以唔提嘅就系Bibi嘅出身。呢位以色列总理高中时赴笈美国，毕业于麻州理工大学。曾经做过以色列驻美大使同埋以色列驻联合国大使。有呢个背景，Bibi唔单止一次同身边人讲，佢对美国嘅认识，系以色列佢认第二，冇人敢认第一。政府内阁讨论政策时，当有人提出唔知美国会有咩反应时，Bibi通常都会讲：“美国就留返比我处理啦。”霸气尽现。
由于历史原因，近代美国历任总统都同以色列称兄道弟，简直可以用处处维护嚟形容美国对以色列的溺爱。美国为咗氹掂以色列，系联合国安理会会议中，曾经以常任理事国身份行使否决权近百次，而当中有三分一都系关以色列事。
所以，当奥巴马系2008年上任时，Bibi都好有自信咁认为自己会同奥巴马相处得十分愉快。不过到后来，Bibi就以“夫妇”（married couple）来形容二人关系。两个人同床异梦，但为咗一啲共同利益将两人绑埋一齐，听到都觉得sosad。
究其原因，同一般情侣关系转差一样，Bibi根本太唔清楚奥巴马谂紧咩，而殖民区同埋伊朗就系双方最大的分歧。奥巴马一上任已希望透过和平进程令巴勒斯坦立国，只不过Bibi冇将呢样嘢放喺心，以为奥巴马只系得把口。
【专页：新闻讲故事】国际大事一看就懂：最易入口的新闻！趣味养份兼备
相对过往的总统，奥巴马对以色列的态度可说是相当有guts。他上任的第一天就打比巴勒斯坦自治政府主席阿巴斯，比时任以色列总理奥尔默特仲要早。
冰封三尺非一日之寒，有几件事令到奥巴马同Bibi愈嚟愈睇唔顺眼对方。时间拨回2009年，两人在奥巴马当上总统后的第一次正式会面。呢个会议原本预计只开一小时，但最后足足倾咗两粒钟。原因：奥巴马突然在会上要求Bibi要完全冻结所有殖民区的活动，而且愈快愈好。听到奥巴马咁嘅要求，Bibi当堂呆一呆，情况就好似叫个购物狂女友从此唔准再shopping一样。即使要顾及形象，内心都一定大叫……NO
据与会者透露，Bibi开完会出嚟时，块面真系黑过镬底。
令到关系继续变差的，仲有之后奥巴马出访中东之旅，竟然skip咗以色列。
可能系因为Bibi诈哂型，于是奥巴马返到美国之后就打比Bibi同佢倾电话。你知啦，通常氹人嘅电话都唔会短，讲到攰攰地，奥巴马索性将只脚放上台继续倾。点知将相比白宫内的摄影师影咗，第二日仲连同一份两国元首通话嘅新闻稿对外发放。呢，就系呢张，系咪有啲印象？
对于呢张相，以色列媒体大造文章，话奥巴马究竟知唔知，用鞋底对住人系一件好唔礼貌嘅事。Bibi有冇因为咁觉得不被尊重同被羞辱就冇人知，不过自此之后，两国媒体基本上已认为两人欠佳的关系难以逆转。
虽然冇咩嘢真系做到，但奥巴马系以巴问题上，已经较以前嘅美国总统无咁偏帮以色列，不过已足够令到玻璃心Bibi唔高兴。
好似伊朗问题咁，Bibi认为伊朗核问题会对以色列造成威胁，但奥巴马竟然冇打算帮佢出头！系呢一刻，Bibi心里面不禁浮现咗港女一般好钟意挂系口边嘅“你（美国）对我已经唔系好似以前咁”⋯⋯而呢件事就造就咗著名嘅“Bibi卡通炸弹事件”啦。
Bibi唔止个名好港女，佢行为都有港女咁可爱㗎，既然无人帮自己出头咯，咪自己嚟啰。2012年系联合国发表演讲时，佢就带咗张炸弹卡通图，话伊朗真系好dangerous（即系好危险啰），一年后就有制核弹嘅能力。不过，堂堂start-up大国整张咁low-tech嘅卡纸，唔讲我以为张卡通系幼稚园讲故事啲storyboard添呀。
▲原图……真系咁架……Bibi讲解紧伊朗有几危险（GIPHY）
网民就当然唔会放过笑佢嘅机会，所以就整咗一系列meme：
【专页：新闻讲故事】国际大事一看就懂：最易入口的新闻！趣味养份兼备
自奥巴马上任之后，美以关系可以话陷入谷底，不和白热化，而Bibi同奥巴马之间嘅冷战亦都系有目共睹。《大西洋月刊》（The Atlantics）著名记者戈尔德伯格（Jeffrey Goldberg）就爆出过，白宫一名高级官员忍无可忍，闹Bibi系“鸡屎”（Chickenshit）。咁新鲜？牛屎我就听过人闹姐？原来闹人鸡屎系更加侮辱，呢个字来自二战时士兵用以形容牛屎都不如嘅垃圾军规，简单啲讲，即系“胶都废事比”。
▲Chickenshit? 我都唔知你讲咩～（Giphy）
飞云听闻01好钟意玩睇新闻学英文，不如一齐睇吓白宫用过咩形容词形容Bibi？
recalcitrant（难以驯服）, myopic（目光短浅）, reactionary（极端保守）, obtuse（愚钝）, blustering（咄咄逼人）, pompous（自命不凡）, Aspergery（亚氏保加症，自闭症的一种，有明显社交障碍及重复特定行为）
闹人都闹得咁多元化，亦发现原来白宫都几毒舌，长知识了！
▲唔好争啦，一人一半又好，成条比我又好啦。（Giphy）
奥巴马当年眼见中国系亚洲影响力日渐坐大，就好想快快手搞掂以巴问题，将外交政策列为“重返亚太”，更加任命反对殖民区米切尔（George Mitchell）为中东特使，希望落实两国方案，推动以巴和平。但Bibi同阿巴斯之间一直未能就国土问题达成共识，霸道Bibi继续扩充犹太殖民区。
奥巴马甫上任已经想著手处理呢个殖民区问题，巴勒斯坦自治政府主席阿巴斯要求国界根据停火协议划定的绿线（Green line）而定，敦促以色列“唔好过界”。但半个世纪以来，以色列系呢个定义底下的巴勒斯坦领土建立大大小小的殖民区，共计57万人迁入，更将非法侵占嘅殖民区当成国土一部分。
相关文章：联合国谴责以色列 克里为美国投弃权解画︰保护“两国方案”
两个方案（two-state solution）本来为纾缓以巴冲突一个折衷方法，方案主张居住于巴勒斯坦境内的犹太人及阿拉伯人，建立两个不同国家（two states for two groups of people)，在阿拉伯人聚集的约旦河西岸（West Bank）同加沙走廊（Gaza Strip）建立巴勒斯坦国，与以色列和平共处。
试谂谂，个情况就好似你平安夜、圣诞节、除夕倒数、大年初一、情人节，都比晒女友，我都系想同契妹过个佛诞姐？你咁都诈我型？公平咩？
台面上，今次奥巴马团队系联合国表决数小时前先至决定投弃权票，令谴责以色列殖民区议案得以通过，但有白宫官员证实，奥巴马一行人已经关注咗议案成年，反映奥巴马已经对野蛮Bibi忍无可忍。
相关文章：以色列报复议案通过 宣布再建殖民区 两国方案寿终正寝？
▲我有得拣咩？我有得拣咩？我有得拣咩？（Giphy）
美国投弃权票背后，Bibi控诉巴勒斯坦阿巴斯系度搞事，同美方达成秘密协议。阿巴斯就好似个契妹咁，你又唔可以完全唔理佢感受，佢楚楚可怜咁望住你，同你讲巴勒斯坦人民连水都冇得饮，1995年签署推动以巴和平嘅《奥斯陆协议》时，已经将80%水资源都分配咗比以色列，而家以色列仲要得寸进尺，要求增加殖民区用水。
以色列驻美国大使德尔默（Ron Dermer）就指控奥巴马政府是联合国决议的幕后黑手，指佢夹埋联合国，一齐阻止以色列在约旦河西岸继续建造犹太人殖民区。简直系哭诉：“你哋夹埋嚟虾人嘅！”
▲你地虾人！扁嘴仔（Giphy）
而2015年一次访美行程中，冷战意味就更明显，Bibi竟然绕过奥巴马，以众议院院长博纳（John Boehner）为主要拜访对象，令Bibi亲共和党嘅立场更加表露无违，而奥巴马亦都不甘示弱，表明唔会见Bibi。
相关文章：联合国通过谴责以色列 美国为何投弃权票 七条问题值得留意
男人唔坏，Bibi唔爱～奥巴马都未正式卸任，特朗普同Bibi已经眉来眼去。特朗普当选后，Bibi第一时间拍咗条短片恭喜佢，咀角含哂春咁话特朗普系“以色列嘅好朋友”，多谢佢咁多年都支持以色列。
至于特朗普，身为候任总统，佢先安抚叫Bibi忍耐多一头半个月，再寸埋联合国都系一班口水佬，只系一个供人玩乐的俱乐部。竞选期间，特朗普都曾经扬言要将美国大使馆由特拉维夫搬至耶路撒冷，变相承认耶路撒冷为以色列首都。更提名鹰派人物弗理德曼（David Friedman）出任以色列大使，佢明确表示过唔会支持两国方案。奥巴马振夫纲？季尾先黎发力，巴基之星咁好后劲都追唔返啦。
如果你以为特朗普系痴心情长剑，可以样样嘢都为咗以色列去做，少年，你太年轻了。到时就知咩叫比人捧上天再挞返落地啦，Bibi。
相关文章：【2017前瞻】豪言力撑以色列 特朗普恐令以巴战火重燃？
【专页：新闻讲故事】国际大事一看就懂：最易入口的新闻！趣味养份兼备