宾利代理商新耀莱爆股权争夺战 福建帮大佬赢面高｜刁佬
年近岁晚股票市场一直期盼既北水甘霖，可惜成个鱼塘干涸，国内股市都要阿爷出手救市，仲边有多余资金南下调到香港。香港系一个倚赖资金流通嘅市场，冇资金出入，最近披露易的通告可谓闷到爆，一打开网站除咗翌日披露报表都无咩好睇，有动作的公司都唔多。新耀莱(970)可算系近来最突出的一间，最近公司发生股权纠纷，攻方仲提出全面收购，火药味十足。新耀莱在去年9月25日公布“有关股权纠纷之最新消息”，公告称有间律师行代表一名拥有公司大量股份之人士，向监管机构投诉股权纠纷事宜。
在此公告之前，见到新耀莱的通告有零星借款人违约事件，及后又被人用禁制令煞停发行可换股债券，似乎攻守双方已全面驳火。就在“有关股权纠纷之最新消息”发出一个月内，攻方终于浮面，原来就系福建帮大佬施清流，施生对新耀莱的管理不满意，决定以折让价一成，每股0.9元收购集团股份。不过同一般的全面收购不同，施生的自愿性全面收购 (“Voluntary General Offer”) 最终目标要收到超过5成股权。执笔之时要约已延期两次，连同施生及其一致行动人士的持股已经收到46.86%。当大家都以为差唔多搞掂嘅时候，原来呢场股权争夺战先刚刚开始。
睇返施生加埋一致行动人士本身都持有26.84%，新耀莱一直以来都唔系活跃成交的股份，估计本来施生都系同管理层一齐合作开，好哋哋搞到反面，应该系有嘢讲唔掂数，九成仲系口讲口赔，如果有白纸黑字又点会净系全面收购咁简单，攞咁多钱出嚟收购上市公司都得，施生都唔争在一千几百攞嚟打官司。去到2023年12月22日为止，要约肯买嘅股份加埋施生自己已经去到38.86%，要去到绝对控股权51%，仲有12%喺街度未收到。之后当然就系第一次延期，去到2024年1月22日为止，施生同老友已经收到42.61%，之后就系传说中嘅第二次延期。
睇返近来的两场投票，2023年1月时公司发行股份有54亿股，其中有8亿股投票支持，约占14.81%。2023年7月公司股份合并后，发行股份只有3.4亿股，其中得900万股行出来投票支持，约占2.65%。照咁睇管理层作为守方其实拥有的股票亦不多，但控制了董事局。如果施生重整旗鼓，今次无论达唔达51%都收哂佢，分分钟送自己入董事局，对家都难以反对。如果守方而家公布一般性配售，施生自己举手话要买一份，或者揾个老友支持一下，对家都好难正面拒绝，否则可入禀话佢处理不公。
一般嚟讲如果股东持有超过20%就可以召开股东大会，所以其实施老板持有26.84% 应该好容易开股东大会，要求上市公司开特别股东大会委任新董事，亦都将一啲不受股东信任嘅董事罢免，其实咁样就可以控制返公司嘅董事局。
不过睇返公司最新公告剧情又有新发展，上市公司状告施老板，刁佬唔再复述，具体内容大家睇上市公司公告就得啦，主要都系怀疑被告与非法手段以高于收购价$0.9收购上市公司股票。场戏好睇嘅系施老板喺第二日1月19号马上作出回应，认为所声称的指控都系冇事实根据。跟住上市公司马上成立独立调查委员会，由三位退休人士组成，退休嘅KPMG合伙人，退休嘅助理警务处署长及退咗休嘅联交所合规经理共同成立。
对唔住都要讲句，个剧情好睇过金手指。自从施老板提出全面收购，以及喺第一次收购完成之后，继续延长要约收购嘅截止日期，所有动作好明显都希望系市场多收股票。根据上市公司嘅披露，施老板同埋一致行动人士已经收到超过1.83亿股占公司46.86% 。相信距离全面控制公司已非常接近。
大家唔讲唔知，新耀莱唔系一间空壳公司，资产净值超过20亿，有形资产嘅净值都超过16亿，而且仲代理劳斯莱斯、宾利、同林宝坚尼三款名车，系男人听到都开心，仲要经营手表、珠宝、名酒、音响、雪茄烟草等一系列嘅产品。一听有雪茄连刁佬都想参加埋一份。公司咁值钱，龙争虎斗自然在所难免，以前呢啲咁嘅股权争夺战都系喺市场度解决，估唔到而家竟然要拉埋官老爷出嚟，真系今时今日做大刁都要提升自己先得。
刁佬相信真金白银攞钱出嚟做全面收购一定经过深思熟虑，唔会玩玩吓，更加冇必要喺市场度擡高个价令到自己收购唔到。剧情发展十分引人入胜大家有兴趣记住留意公司嘅公告同刁佬个专栏。
简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。