“港版淡马锡”管钱600亿 势令全港老千嗒晒糖｜刁佬
“港版淡马锡”的香港投资管理有限公司（HKIC）近日委任陈家齐做首任CEO，睇此君CV，边位嚟？未做过Buy Side，又未做过Sell Side，做律师出身，再入政府转做AO政务官，去过财库局同金管局就识投资？未曾带兵征战沙场，政府各位高手唔好玩啦，一个只系有钱但无班底，仲要自己去揾项目嘅投资基金，最后只会沦为橡皮图章，被身边一群虎视眈眈库房已久的豺狼水去买自己基金食剩嘅厨余。
可能刁佬睇得美剧太多，剧本通常都系要揾个唔知乜水做老细，喺佢身边安插一众大内高手，左手送上因时间关系一早准备好嘅营养大餐，再由右手包装好交比老细加工，老细通过一轮丰功伟绩嘅工作之后，最后由亚公基金接手。如果项目成功，自然老细万岁万岁万万岁，万一投资失败，当然系投资可升可跌，再伟大嘅项目都需要时间去栽培。三几年过去，个老细都要开始要换人，万一项目等唔到三几年就爆镬，老细失败下台黯然辞职，台前幕后一众高手就可拜拜，幕后暗黑老板亦已经把基金的钱袋袋平安。
香港投资管理有限公司未开波就已被称为“港版淡马锡”，如果淡马钖听到，真系会觉得自己被拖低水平。按照过往惯例，香港政府投资管理过不少基金，关爱基金及创科创投基金，仲有董建华发起的团结香港基金一样，不过大部分嘅结果都系不了了之。
再睇下香港投资管理有限公司的董事会组成，包括主席财政司司长，财政司副司长、财经事务及库务局局长、创新科技及工业局局长、商务及经济发展局局长、香港金融管理局总裁、香港金融管理局副总裁、香港投资管理有限公司总裁、冯国经博士、刘遵义教授、林振宇博士及唐家成先生。睇到咁真系不禁摇头，基本上每个财经官方机构都系呢班人，佢哋系各自领域都系人中龙凤，不过就系冇人落过场去做基金经理，如果有呢班人就掂，今时今日香港国际金融中心地位就唔会搞成咁。
中国成语叫种瓜得瓜，外国则叫”Garbage in garbage out”相同的投入只会出相同的结果，大家觉得香港投资管理有限公司会系咩下场？
620亿，差不多每位香港市民贡献一万，不过今时今日个市咁差都唔知仲可以买啲乜，想摸底买地产股又怕被人话官商勾结，输咗俾人笑，赢咗又话你食人血馒头。买医药股咩？几十只生物科技公司都输穿底，仲边有人够胆买，真系做医疗服务嘅公司，你又嫌人哋细，仲要唔知仲有乜畀你投？最后同指数挂钩，又怕人话你懒。未上市嘅公司就又更加唔敢去投，呢个基金真系未曾相爱已无情，基本上未成立已经失败。
如果香港投资管理有限公司的模式改为matching mode跟投模式，当政府重点推介的行业IPO 上市，公司集资到一蚊，基金就出一蚊跟投，基金习中精神去揾人睇住IPO上市公司的资金运用，反而仲可能有前途。另外如果呢个基金赚到嘅钱会按比例派息比香港市民，相信每一位市民都会努力监督所有投资项目，出事机会将大大降低。
授人以鱼不如授人以渔，刁佬刚刚交完税好肉痛，620亿喺每个市民眼中都系一个天文数字，喺呢个市场死人冧楼嘅时候，希望官老爷真系可以好好运用呢笔钱，唔好当烟花烧咗就算数。
简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。