张松桥现身“鬼佬福临门”　拆DaDomenico成富豪饭堂之谜｜珍姬蜜

近年内房处于低谷，中渝置地（1224）老板、有“重庆李嘉诚”之称的富商张松桥，在港也渐趋低调。有说佢近年活跃于英国，周不时现身伦敦，皆因中渝置地喺伦敦高尚住宅区Notting Hill“插旗”发展。唔单止起豪宅，仲有五星级酒店，准备喺英国“大展拳脚”。

不过，小珍日前就喺有“鬼佬福临门”之称嘅意大利餐厅Da Domenico，撞到张松桥出席友人嘅生日聚餐。小珍见到佢精神奕奕，心情不俗。

张松桥当晚与同行友人十几人，齐齐坐喺VIP房，享用美酒佳肴，大家有讲有笑，场面轻松愉快。小珍所见，佢对当晚选单十分紧张，聚餐途中亦由房间走去厨房外面，同侍应亲自打点，毫无架子，看来是熟客仔。

大刘及赌王均是常客

Da Domenico叫得“鬼佬福临门”，嚟用膳嘅客人都系城中富豪，张松桥老友“大刘”刘銮雄亦系其中一位熟客。提起大刘，又令小珍记起2008年，发生喺仍在旧址的Da Domenico嘅一单趣事。

话说当年，刘太“甘比”陈凯韵诞下大女刘秀桦后，大刘前女友吕丽君曾出公开信，称不知谁是女婴父亲。大刘未有即时发声，但事件发酵期间，曾到Da Domenico食晚饭。当晚吸引大批记者到Da Domenico守候大刘。无独有偶，已故“赌王”何鸿燊一家人亦到Da Domenico食饭。

赌王饭后同门外守候嘅记者讲，自己恭喜大刘添得一位“万金”（原话：香港添丁好平常， 人哋生嘅就系千金，佢而家就万金。），直接帮大刘“承认”诞女。之后仲风趣地同记者讲，谂住帮记者问吓大刘几时为“万金”摆满月。

靓食材水平稳定　 成富豪饭堂关键

福临门能够成为富豪饭堂，全因制作功夫菜及鲍参等名贵菜式了得。再加上，福临门对客人十分上心，酒楼嘅员工包括代客泊车，同门口报纸档阿姐，每次见到客人都主动打招呼。

但唔好以为“鬼佬福临门”Da Domenico有同样服务，虽然帮衬嘅客人星光熠熠，但查实Da Domenico，门口无大招牌，非常低调。餐厅内冇奢华装修，餐厅员工亦唔多，少中式餐厅员工同你热情打招呼的氛围！能够吸引城中富豪，靠嘅系长期保持平稳高水平嘅美食。

常见嘅Burrata，喺Da Domenico一啲都唔普通。奶味香浓幼滑流心嘅Burrata，配上清甜无草青味嘅蕃茄仔，令人回味。招牌菜红虾意粉卖相一般，但索价逾千元仍是每台客人必点菜式。全因用上由罗马直送嘅红虾，意粉挂上虾头内嘅虾膏同虾油所混合嘅浓虾汁，彷似食到喺意大利小岛嘅小餐馆味道，非其他米芝莲餐厅可媲美。