刁嘴排行榜大战开心香港市集 抵食过80蚊炒米粉｜刁佬
失惊无神政府公布开心香港计划，全城热抢热炒30蚊戏飞。讲到食，系一个人人都开心嘅话题，偏偏沙田开心香港美食市集开幕脱脚，遇上黄雨暂停。暂停前30蚊6粒鱼蛋、80蚊炒米粉，市民纷纷都觉得㓥客同贵，仲要唔洗交租引来城中热话，有美食市集做对比，忽然间大家都觉得南山邨同旺角原来几咁好。
最近五月天同周杰伦来港献技，五月天话每日要饮五杯冻柠茶，周董夜晚宵夜都系食面，就知道香港美食几大魅力。学巴菲特话斋，投资唔洗下下高大上，睇吓身边啲人做紧乜就知道有乜好项目。其他公司唔知，刁佬工作室每次下午茶万岁都系饮珍珠奶茶，人人高兴。刁佬亦见唔少读国际学校同留学欧美的年青一辈，识得字正腔圆叫出心仪的 Bubble Tea （珍珠奶茶）。可见香港本土美食的确是魅力没法挡。
有人嘅地方就有江湖，有江湖地方有好多人肚饿，与其由外人主导既小红书及米芝莲写推介香港本土美食，不如政府搞返个刁嘴香港美食排行榜，严选大家心目中的百大冠军美食，仲要分开评审组同民选冠军组，邀请返周星驰颁奖，实行人人都可以做食神。香港百大美食，其实数数下都好易数哂。鱼蛋、烧卖、鸡蛋仔、格仔饼、碗仔翅、奶茶、蛋挞、烧鹅、叉烧、牛腩、牛杂、肠粉、菠萝油、臭豆腐、狗仔粉、手拉肠粉、粉果，真系数极都数唔晒。睇来净系要成为香港百大美食随时都要打大交，点解濑尿牛丸冇份……
每项美食选三几间，比人投票做冠军，赢咗就可以威足成年仲可以卖广告，2023 年香港最受欢迎鸡蛋仔，刁佬听到都想食。叫上次安心出行班大哥帮吓手，整个“香港食神”Apps畀人储印花，成百样美食，走匀香港食晒百大美食都起码要成个月，吸引游客嚟足香港几次，储齐印花可以换车票或者机票，每年又再选过，个概念简直长玩长有，而且香港陀地同游客都可以一齐玩，谂起都开心。
嚟香港玩，都系购物同食，住就唔好提。同样概念又可搬到购物上，买音响、相机、电话要去边，邀请全民投票。最近香港团逼爆土瓜湾，导游带游客食速食店，被游客觉得香港唔好玩，无新意，咁样嘅免团费购物团，梗系唔好玩啦！旅行社同导游搞旅行团都自然为赚钱，刁佬提议政府搞返个香港三日两夜游行程计划大赛，等各大旅行社同导游踊跃献技，最多人购买的行程自然系最好的，政府应该送上电子购物券比呢一班咁有眼光嘅游客，令到越受欢迎的行程越抵玩。更应真金白银奖励一下咁有创意嘅旅行社同导游，重赏之下不单止有勇夫，仲有好多创意，刁佬一直相信高手在民间。
简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。