【温多娜手记】曾俊华拍宣传片　扮《金鸡2》华仔冀港人有得拣

前财政司司长曾俊华“退而不休”，除咗加入多间金融科技公司做顾问，亦不时于网上发功抽水。近日“薯片叔”为虚拟保险公司Bowtie（保泰人寿）拍摄宣传片，就大玩电影《金鸡2》经典场面，仲寄语香港人要“有得拣”！

穿越至2047称香港人仍“无得拣”

短片入面，呢位“华仔”学足喺《金鸡2》饰演2047年特首嘅刘德华，但就笑笑口话“我唔系特首”，又提到虽然嚟到2047年，香港人好多嘢仍然无得拣，但至少买保险就有得话事，希望每个香港人都可以拥有一份保障。

落足咀头Sell保险，原来因为“薯片叔”早于4月就加入Bowtie出任资深顾问，一直为呢间保险公司出谋献策。佢喺新闻稿提到，香港人虽然于众多事情上尚未有选择嘅权利，但希望以行动启发并推动创科发展，用最基本嘅方法改善社会民生，未来会与Bowtie紧密合作，透过推广活动加深港人对保险嘅认知，希望减轻香港公营医疗压力。

Bowtie联合创办人兼联合行政总裁颜耀辉就话，希望透过网上科技，令港人可以自行投保及掌握自主权，为香港大众打开全港私家医院大门。