【温多娜手记】新地第三代堂兄弟首合作跑接力　细佬基泓话有压力

是日一大早，郭氏家族第三代、新地（0016）执行董事郭基𪸩（Adam）和郭基泓（Christopher）两堂兄弟再度落场参加“新地公益垂直跑—勇闯ICC”亲身撑慈善。今次更系两堂兄弟首度合作跑接力赛，由堂细佬Christopher跑第一棒，而堂哥Adam就跑最后一棒，负责冲线。

堂兄弟首度合作，成绩仲唔错添，喺企业组队际接力赛取得第六名，时间系15分19秒，好过之前两人分开跑个人赛嘅成绩。

有咁嘅成绩，托赖队友之外，两堂兄弟喺比赛之前两个月已经练习，Christopher话两人平时喺新地总部后楼梯放工后练习1小时，大大话话都要跑上53层！Christopher赛后分享心得话：“一头一尾，交棒一定要交得靓仔”，Adam则补充“最紧要唔好仆亲”。

对两堂兄弟合作跑接力，Adam就笑笑口讲：“有啲新意，两个人一齐跑几好玩，好过自己一个跑”，Christopher则认有压力，“大家共同目标，如果自己做得唔好会拖累埋其他人，多咗motivation”，同埋“精神上有压力，所以会努力多啲”。

今次活动参加人数达1,900多人，Adam就话有信心出年可达2,000人参加，而今次所筹善款达600万元，当中三分之二都系集团额外捐款。