廖孖记｜黄杰龙称做生意要讲诚信　绝对冇可能“静鸡鸡”更换

廖孖记腐乳第四代传人廖晃业，今日在电台节目讲及早于30年前，因未能符合法例陷结业边缘，最终决定外购腐乳解困。他又透露原材料来自港商经营的内地厂，惟强调一直在港进行后期加工。过去数日有留意事件发展的叙福楼（1978）主席兼行政总裁黄杰龙于社交媒体发文，指出“听咗访问，食安𠮶部份放埋一边唔讲住，对于做生意讲诚信呢一点有嘢想讲”，又指出若旗下“挽肉与米”有一日变成“喺深圳揾一啲现成嘅汉堡扒嚟卖”，“一定会事先同大家讲，绝对冇可能诈诈谛谛静静鸡换咗唔话俾人听继续收人咁多钱”。

黄杰龙于文内指出﹕“想讲系因为我都经历过， 17年前我接手叙福楼嘅时候，当时只系得五间基本上系蚀本嘅屋村酒楼，经营嘅方式在当时看来也算相当传统，特别是包括所有点心每日由师傅新鲜现场摙出嚟，所有上汤都系现场由师傅熬出嚟。当时作为一个工程师、工商管理硕士学位嘅我，其中一样必定要面对嘅就系如何改革，当时整个餐饮业都开始讲中央工场，OEM买现成点心、包装上汤。”。

他又指出﹕“我当时作为新入行自居改革者嘅身份，有一个自称包装上汤做到好好、好多香港大集团都用咗佢嘅一个供应商话要同我见面，所以我就约咗佢去我其中一间酒楼度饮茶听吓佢讲，当然佢系讲到效果好好同埋平好多（咁事实系如果买𠮶啲汤师傅人工、材料、煤气等等肯定系悭好多），坦白讲，我当时都唔系好肯定系唔系应该用，都系想试吓。当年我爸爸仲唔算太老只系六十几，都仲系每日返酒楼嘅，佢见到呢个人走咗之后就走来问我系咩人，我如实话俾佢听。然后佢块面黑晒，从来喺工作上冇咁恶闹过我，我到而家都好深刻，佢话：“以后唔准佢再入我哋公司门口！”我见佢咁嬲都好愕然，回答咗一句“我唔系要用，试吓啫，都要知道下个社会嘅变化”佢仲恶：“试吓都唔准，行入嚟门口都唔准，俾人见到佢行入嚟人哋都以为我哋用呢啲咁嘅嘢！”呢件事我好深刻，从此之后我冇再见呢个人”。

他亦表示﹕“通过呢件事我亦都从我父亲嘅身教之中学识咗，我哋叙福楼系要货真价实嘅，有啲嘢系会贵啲成本，有啲嘢系比较效率低，但系更加重要嘅系保留某一啲价值观。当然童话故事唔系永远只有完美结局，一直坚持人手做唔代表生意好，所以后来大家都知所有叙福楼都结业，但系到结业之前最后𠮶一日，我哋所有点心、上汤都仲系现场造。就算今日仲系营业中嘅天水围煲仔王，都仲系所有点心现场做。”

黄杰龙指出﹕“系想表达，如果30年前某一个生产腐乳重要过程已经变咗唔系自己做，咁之后你啲宣传、访问、点可以继续讲返真嘅一样现场做？ 如果因为某啲社会嘅原因或者法例嘅原因某一种工序已经唔可以再喺香港造，只能够坦诚同消费者讲，系唔系继续买系消费者嘅决定。是否净系老字号需要咁呢，唔关事嘅，所有商业活动都系诚信行先，好似我最近IFC开𠮶间挽肉与米，跟足日本社长嘅要求喺现场每日用日本牛肉新鲜制造汉堡牛肉，所以喺现场做咗个10度嘅玻璃冷冻房，就系为咗俾人客睇到。既然系公开讲咗承诺咗，就当然系一直会咁做，如果有一天我哋变成喺深圳揾一啲现成嘅汉堡扒嚟卖，为咗控制成本，我都一定事先会同大家讲，绝对冇可能诈诈谛谛静静鸡换咗唔话俾人听继续收人咁多钱。当然，我亦都冇咁蠢会走去咁样做，因为我爸爸17年前已经好认真咁教咗我做生意讲诚信呢个终极道理。”