冲出香港横跨洲际 航天科技一飞冲天｜刁佬
早几个月之前刁佬讲过香港少有嘅本土航天科技公司，香港航天科技(1725)股价冇一飞冲天，反而因为董事受到越南政府通缉出现大量人士变动，转个头喺今年5月9日喺法庭嘅公开文件之中，见到传讯令状（Writ of Summons）有佢大名，被圣约翰大厦有限公司追讨131.29万元，力压同一榜上有名，被市民追讨5,600万的李家超，唔知同我哋特首系咪同一人。估计香港航天科技都系欠圣约翰大厦租金，于是被入禀法庭追债。
其实人哋已经改咗名唔再系香港航天科技，而系冲出国际的洲际航天科技。刁佬孤陋寡闻，洲际弹道导弹就听得多，通常导弹都系秘密地潜伏，收到指令之后轰轰烈烈地飞出去，命中目标再爆埋，估计洲际航天科技都系咁上下意思。
既然要冲出香港，个董事局又点可以只有香港人，前财经事务及库务局局长陈家强、行政会议成员林健锋及最近被越南政府通缉的前数码港主席及中央政策组成员林家礼，心系香港的蒲禄祺、汇丰银行前主席艾尔敦等都先后完成历史任务，相继下台。一看之下原来呢一班有头有面嘅知名人士都参加过团结香港基金，睇嚟呢个本土智慧嘅国际大戏已曲终人散。
金紫荆星座已经发射成功，顺利升空一飞冲天，冲过大气层之后成功进入基金运行轨迹，散货畀指数基金、大妈及钱多人傻的富X代，系时候重新制作另一颗人造卫星，再搭过另一个冲出香港横跨洲际嘅国际大戏。
见到新上任的董事，全部都系国际航天专家、皇室成员，近期流行家族办公室，徇众要求之下加入杜拜王子自然唔少得，贵为皇室成员，宗室自然开枝散叶，皇亲国戚众多。至于国际专家更加系恒河沙数，刁佬只系香港金融界嘅一个搬砖小民工，自然唔知佢哋系边个。不过呢台国际级大戏，又点会系刁佬呢个水平可以听。
九龙城寨咁好睇，因为城寨已经成为历史，在回忆之中嘅过去当然十分唯美。但系一个玩烂咗嘅棚要重建，无返一啲国际级嘅美术指导又点能够成事。到底佢嘅卫星会唔会再度灿烂地升天，抑或最后光茫已绽放，大家拭目以待。不过刁佬提醒各位，地心吸力永远存在，如果冇实力，能够喺高空轨迹继续翱翔，升到几高就跌得几低。要搭上卫星嘅旅程大家最好有心理准备戴好降落伞以保自己安全，万一升空后喺高空轨迹无法落地，面对宇宙洪荒孤独终老仲惨过困䢂。
简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。