收股票代找数 鹰君增持朗廷之化骨绵掌大法｜刁佬
近年证券行生意难做，为增加新客源无所不用其极，不单止免佣金，更常以送股票开户作招徕，不少新客户收到几股汇丰或腾讯感到开心，可见在投资者心目中有成交嘅股票同现金一样咁值钱。曾经有一位股坛的老前辈告知刁佬资本市场嘅真相，其实上市公司同一般公司除咗股票可以自由交易之外，基本上运作冇任何分别，当然因为上市公司嘅股票需要喺市场公开交易流通，要提供更多资讯供投资者评估系咪值得购买，所以老人家只话畀我听一句说话，公司没办法印钞票，但可以印股票。如果你公司值钱，股票就等于钞票，所以如果上市公司喺唔够现金或是市场对股票估值太高时，用股票收购目标项目或公司就好有用。调返转嚟讲，当一间好嘅公司啲股票唔值钱嘅时候，当然用钞票去换股票。
上期讲咗鹰君私有化朗廷的精心三年部署大计，今期再讲吓鹰君筹备私有化朗廷的细致部署。既然朗廷都低价咗咁耐，鹰君到底喺期间仲做咗啲乜，令猎物一步步坠入囊中？
朗廷酒店投资系鹰君之全资附属公司，每一年朗廷信托都会与朗廷酒店投资签订酒店管理协议及商标许可协议。从2021年开始，朗廷信托一直都冇用现金去支付呢一笔管理费，所以帐面就出现“未清偿管理人费用”，既然朗廷嘅股票价值咁低，而且公司现金亦都有限，鹰君大发慈悲，慷慨地接受朗廷信托发股票代替找数。原因自然话酒店业在疫情大流行期间受挫，用股票找数可加强其财务状况及现金流云云。
从2021年开始，鹰君已从协议中获得0.72%的朗廷信托股份，2022年再获得1.03%，2023年等待股东大会批准获发的股份更创新高至2.6%，逐步有序增持。简单嚟讲即系鹰君通过输出服务令持股量增加。
据今年4月14日的通告，朗廷信托尚未向酒店管理人支付截至2023 年 12 月 31 日止六个月的管理人费用约为 3,581万港元，换算成股票系55,432,596新股份。以现时朗廷信托已发行股份1,151,454,000计，新股份将占4.59%，不过朗廷信托在通告中表示鹰君已持有74.06%，再印新股票的话，公众持股量就会低过25%的规定。
朗廷酒店投资与朗廷信托签订酒店管理协议及商标许可协议，除咗系一种股票增持大法，亦都系部署顺利交接的仪式。试想想鹰君过去几年已经全面接管朗廷嘅管理经营，当朗廷私有化后马上无缝交接。如果一般嘅收购合并，即使是系内公司，都难免因为管理层发生变化而有不适应，不过鹰君早已负责朗廷的酒店管理，私有化与否都是同一班人做，除咗朗廷股票不再在市场流通之外，理应无适应问题。
刁佬十分佩服呢一啲耷低头做事，闷声发大财嘅企业家。佢哋10年磨一剑，低调沉稳。相比起好多都刀舔血，有今生冇来世追求短时间之内绝对回报嘅基金，企业家更能为股东创造出惊人嘅回报，当然开心与否就要睇吓你系买咗鹰君嘅定系朗廷嘅股票啦。
喺刁佬心目中财技只不过系运用资金的技术，并唔系两手空空，凭空变出小白兔的魔术，无论技术几高超，如果冇一盘实在赚钱嘅生意，无中生有嘅财技最后都系镜花水月一场空。喺股市低迷嘅时候，大家更容易见到沉稳实在企业的投资魅力，希望大家投资路上睇得清楚，避免成为各路高手的点心。
简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。