热血励志不再　王道日漫系咪没落？

当下好似只系得返草帽一伙努力咁支持住热血梦，戴志伟、鸣人、星矢通通已离场，如果有日尾田老师都收工，系咪亦都意味住“王道动漫”正式从江湖消失呢？或者我哋应该先谂下，点解呢几年所谓“邪道”嘅动漫咁得人心。

我呢，系日本动漫奶水凑大嘅。

余家贫，去图书馆以外，屋企部 18 吋电视就系最大娱乐。喺粤语残片未播嘅上昼，同埋《五棱镜》未播嘅黄昏，陪住我嘅就系《功夫猫党》、《机甲桃太郎》、《魔神英雄传》、《魔动王》……到夜深，偷鸡喺上格床爬落地，谂住可以独霸电视睇星矢或者孟波，结果就被一早坐喺电视面前嘅舅父断正押解回床。𪠳，条友肯肯定自己想睇《城市猎人》之嘛！

再大啲，开始有啲零用钱，就会买漫画嚟睇，然后同同学交换睇，再然后就走去租漫画睇。对比起今日拎起部电话，就可以“用自己方式”睇新番，当年呢阵古早味真系值得再三回味。

热血励志王道动漫退潮　揭尽人性丑恶邪道元素大热

以前嘅少年动漫，包含嘅都系所谓“王道”元素：即系够热血励志，主角无论系为咗拯救世界，定系成为世界第一球王，都会努力特训强化自己。敌人好劲咩？唔惊，仲有精神时光屋畀你出少少术；打输咗咩？唔紧要，歹角一定唔知点解留你一命，等你有机会苦练后再报仇。再残忍嘅现实，都无法子打倒主角嘅梦想！用返漫画杂志《周刊少年 Jump 》嘅讲法，就系强调“努力”、“友情”同“胜利”。

有老鬼话，近年啲动漫无咗呢种热血汗臭咸味。除咗 Jump 曾经嘅“三本柱”：《One Piece》、《火影》、《死神》之外，好多大热嘅动漫，好似《死亡笔记》、《魔法少女小圆》、《进击的巨人》、《20世纪少年》等等，唔只一啲都唔热血励志，反过来仲揭尽人性丑恶黑暗一面，根本系走上另一端嘅“邪道”。

当下好似只系得返草帽一伙努力咁支持住热血梦，戴志伟、鸣人、星矢通通已离场，如果有日尾田老师都收工，系咪亦都意味住“王道动漫”正式从江湖消失呢？

或者我哋应该先谂下，点解呢几年所谓“邪道”嘅动漫咁得人心。

日本经济环境转变　王道动漫热血变离地

动漫同电影一样，系反映社会现实嘅一面镜，将创作者对社会嘅解读同谂法呈现咗出嚟。1970、1980年代系日本经济嘅黄金期，亦都同时系少年漫画嘅黄金时期，呢个并唔系单纯一个经济巧合，而系信念嘅一脉相承──“只要你努力，未来就喺你手中！”王道动漫世界，邪永远不能胜正，结果永远系坏人被罚，正正系整个社会相信“努力就可以获回报”嘅一种憧憬。

之但系，1990年代起，日本进入泡沫经济崩坏嘅时代：可以憧憬嘅未来变得黑暗、努力唔担保一定有回报、会社唔再系终身制、过劳死流浪汉比比皆是，令年青人唔再相信“努力有得食，好人有回报”呢套王道理念，更难叫佢哋去睇热血到离地嘅王道动漫。

研究社会变迁会点样影响动漫剧情同结构嘅日本评论家宇野常宽，喺佢嘅书《 00 年代的想像力》中就话，呢种氛围最初令年轻人选择“隐蔽”，唔想再做任何决定（因为都改变唔到绝望），到后来慢慢转化成一种“决断主义”、“相信某件事物，然后行动”，采取任何手段以求活下去。

动漫走向多元化　王道动漫吸纳邪道元素

喺“决断主义”影响下，少年人选择相信嘅理念百花齐放，动漫发展自然走向更多元化：既然努力无用，点解仲要按传统去盲目追求力量？所以有斗智嘅《死亡笔记》、《 Liar Game 》，亦有讲以复杂念能力系统、属性互克嘅《全职猎人》；既然服从社会主流会不得好死，点解唔自己去话事？于是又有《反逆的鲁鲁修》出现。正邪界线再唔系绝对，而系按信念决定，传统正义方嘅魔法少女，系《小圆》嘅世界里面，代表嘅只系身不由己嘅可悲，而堕落嘅魔女，又岂能话佢哋就系邪恶？

2011 年日本 311 大地震，对创作者又带嚟变化，除咗有各种“末日感”重、要为生存而战嘅作品面世外。另一位日本评论家东浩纪喺一次演讲中就指出，灾后整体文化现象由以往嘅政府疏离变成与社会有连结，文化界主题唔再脱离政治化之余，亦开始以关心地区为本位去创作，因此陆续出现更多非王道向的作品。

抛咗咁多书包，我始终觉得百花齐放系好事，而王道动漫系会继续存在。关键系点样吸纳邪道动漫优秀嘅元素，好似《一拳超人》，省却咗主角训练嘅“王道”情节，换成爽快嘅节奏同自嘲嘅境况；又或如《暗杀教室》，王道嘅成长走向但配上“杀人”嘅反差等等，不断转变、修炼、进化，唔好只识卖萌、卖肉、杀必死，王道漫画嘅生存之道，正正就是一种王道。

何况，成年人总系有需要王道动漫嘅时候，畀自己一啲向前走嘅动力。当现实不断磨蚀意志，有咩比起睇动漫主角跌倒再起身嚟得励志？抹一抹眼角感动嘅眼泪，我哋又再咬紧牙关努力向前行，呢个就系王道动漫嘅力量！

天呀！收笔就谂起《天元突破》，系时候翻睇了！

（本文纯属作者意见，不代表香港01立场。）