【周星驰．来稿】喜剧之王：就算是尹天仇都不错

文：力高

周星驰咁多套戏之中，真系特别钟意喜剧之王。

记得细细个跟屋企人入戏院睇，最深刻就系一开画，几个扮鬼嘅茄喱啡在镜头前左右掠过。

令我一直都以为，呢场就系开画嘅第一幕。

直到大个咗重睇，先知原来第一幕，系尹天仇背对镜头，面向大海，穿着一如既往的灰色套装，

大喊 : “努力，奋斗。”

自从发现咗有呢一幕，尹天仇的这个大喊就渐渐喺我脑海留下好深刻嘅回响。一个会叫自己加油嘅人，就算最后还是一事无成，还是值得敬佩。

虽然喜剧之王叫喜剧之王，但我觉得都几黑色幽默，有人话呢套嘢系周星驰嘅自白，我无咩意见，反而只纯粹觉得呢套戏系一个自嘲的故事。

尹天仇对做戏嘅执著同热爱，一直都用一个最有修养嘅方式看待。

为自己不断争取机会的同时，亦不断遭受别人的嘲弄与否定。

但整个过程，都无怨天尤人，即使佢满口戏剧理论，但被人赶出场地时，从来无埋怨或质疑过对方的判断。最多，都只系想拎返属于自己应得嘅饭盒。

故事起承转合，我觉得个“起”，系由柳飘飘出现开始。

因为佢哋相遇之前，都只不过系以不平淡的方式去交待尹天仇平淡的日常。

直至柳飘飘出现，成个故事就开始变得有血有泪，而尹天仇嘅人生都起咗变化。

柳飘飘，系尹天仇第一个观众，亦都系第一个由内到外欣赏尹天仇嘅人。

一生人之中，自己都未必识欣赏自己，但系居然能够遇上一个会彻头彻尾欣赏你嘅人，系一件几咁难能可贵嘅事。

最感动我𠮶一幕，唔系尹天仇同柳飘飘讲：“我养你呀”

而系佢哋两个坐喺海边，一齐望著个大海，尹天仇用力揽紧柳飘飘，好用力地讲咗两次：“多谢”

我觉得，两次多谢，系有唔同意思。

第一次视佢为观众，多谢佢捧场。第二次视佢为女人，多谢佢欣赏自己。

能够遇到一个相惜相知嘅人，真系比遇到一个伯乐仲难。

尹天仇每日都努力奋斗，直到有一天终于出现第一位支持自己的观众。

𠮶种感激，比起多谢两只字，那一下紧紧的拥抱表达得更有力。

虽然尹天仇在外人眼里，可能系一无事处。但佢对演戏及做人的耐性与修为，比一般人都高。

踏实争取，即使不被人认同，机会一一流失，

都不颓废不厌世，依然会因为见呀婆畀人呃而觉得怜悯，自己拎钱畀返呀婆。

输掉任何东西都好，都不输掉做人的态度。

虽然被评没有演技，却也不输掉作为一个演员的专业，因为茄喱啡都要演技架！

我想，一生人为理想为生活奋斗，最后就算得不到半点成就，只要能够遇上一个懂得欣赏自己的人，都已经赚晒啦。

（本文为投稿，稿件可电邮至iwanttovoice@hk01.com；文章纯属作者意见，不代表香港01立场。）