【No Game No Life．来稿】满足对“只要努力就会成功”的想像

文：柳臣

No Game No Life（中译：游戏人生）系一套由日本作家榎宫祐创作嘅轻小说，改编咗做动画，最近啱啱上埋电影版。呢套作品之所以咁成功，系因为佢嘅设定引起好多时下年青人既共鸣。柳臣个人唔特别钟意呢套作品，但当系成功作品研究，倒值得分析一二。

世界观用咗近年好兴既异世界设定，故事背景讲述两个明明系天才嘅两兄妹，但系因为生不逢时被冠以废青标签，只能够喺游戏世界里面得到满足。因为喺游戏世界入面，唔需要面对无谓嘅交际，复杂嘅人事关系，一切以实力说话，赢就系一切。于是两兄妹嘅愿望俾异世界既游戏之神听到，将佢地拉咗入“游戏世界”，一个以游戏决定一切嘅世界，两人仿佛重获新生，觉得呢个先系属于佢地嘅世界。

条桥其实好简单，异世界既世界观亦唔新鲜，但作者成功捉到人性既盲点：每个废青都觉得自己生不逢时。佢地讨厌呢个世界，觉得努力无回报，觉得点解有啲人做咁少野，自己做咁多野，最后大家得到既系一样；觉得点解靠关系反而上位，唔埋堆就被批斗。呢班人唔系觉得自己无能力，而系觉得呢个世界无办法展现自己既能力，自己被呢个世界埋没，觉得呢个世界唔适合自己。佢地希望最好每个人头上一清二楚刻住一个能力值，系因为佢地相信系一个胜负分明既世界，佢地系胜利既一方。

没错，人如果减少无谓既交际，无咁多复杂同麻烦，世界会变得单纯好多。但系咁单纯既世界，系咪真系你可以生活到既世界？

一个胜者为王既世界，就必然会制造大量既失败者。一个有明确目标既世界，就无得推诿，再无失败既借口。一个只要努力就有同等回报既世界，就必然会照见到自己有几唔努力。

你有冇试过曾经因为心里面出现一丝担心，担心如果自己努力完之后出黎既结果，仍然俾人否定，所以索性唔努力？因为唔努力，失败就唔系因为无才能。最荒谬既系，明明失败了，却能活下去了。呢个就系我地身处既现实世界。

No Game No Life系一面照妖镜，每个人都想攞佢黎照其他人，去证明人地只不过系靠住而家呢个世界既荒谬而得益，并唔系真材实料。但系你有冇谂过，你自己本身都系呢个世界下既一只妖怪？

讲真，你要一个成王败寇既世界周围都系，运动世界就系一个咁既世界、拳击比赛上就只有赢输、新兴运动电竞亦然，打机既人何止千万，你会记得既只有少数胜利者，赢既人得到一切，输咗就咩都唔系，甚至无人会记得你。游戏听落好儿戏，但事实系游戏比现实世界更残酷，更讲究实力。柳臣知道好多人仍然睇唔起游戏，但系同时好多人已经进入No game，No life既世界。就连香港出年一月都会有一场国际级电竞比赛“K11电竞锦标赛”，甚至有中国国家电竞队参赛，可算系亚运电竞前哨战。听讲初赛已经岩岩打完，胜出既“拿C里、Kaho”即使晋身首队香港代表队你都未必知道佢地个名，更莫讲话输咗既其他队伍。好多人幻想既又pure又true既世界就系咁现实，赢既只能一直赢，输既更加要赢，中间无灰色地带。

当个样野客观咁去分高低胜败既时候，你敢唔敢面对自己其实系一个失败者？你系而家呢个世界，仍然可以有丁点儿自信，觉得自己有小聪明、有计仔、小天才，系因为你从来都无去比较过、亦无须要证明、无排名、无数据。而事实系世界上绝大部份既人都系失败者，所以点解个世界会发展到咁无趣，会令每个人都觉得自己系有才能不被发现，不被了解，正正系想要保护弱者，保护大部份人。因为系呢度，你仲可以自我欺骗，赖系世界既错，讨厌呢个世界。但如果真系有一个No game No life既世界，当个世界好公平咁话俾你听“你系垃圾，你什么都不算。你以为你是天才？别说笑了！你那点所谓的天分，哈哈哈！根本连个屁都算不上。”到时你就连呢个权利都无埋，你就只可以讨厌自己。当然而家你都会系某啲时候认知到呢件事，但你不需要去面对，你仍可选择逃避，逃避虽可耻但有用，系咪？

呢个系现世界对你既保护，我地都系从个个残酷既世界逃出黎既懦夫，要我番去？不了。但系时间耐咗，慢慢忘记自己系懦夫既事实，好似动物农庄咁，一开始明明系为咗逃离个样野，结果后来反而觉得个样野最好。幻想往往系美好既，所谓隔篱饭香。

呢种想法唔单止令人觉得世界欠咗自己，甚至令我地钟意对身处胜负分明世界既人指指点点，觉得佢既然身处咁美好既世界，应份做得更好。仲记唔记得曹星如比赛既时候，香港人几多意见，教佢打拳当然可笑，柳臣甚至见过有人系网上教曹星如比赛既心态，讲到头头是道。从来无谂过，一个世界冠军既比赛场，根本系我地呢啲常人无法企及，佢所受既压力我地根本就无体验过。对于呢班真系活系成王败寇既世界既人，我地除咗拍掌，仲边有资格去指点啲咩？又如新世界第三代接班人郑志刚积极推动本地电竞产业，联同国家体育总局系香港一个咁荒谬既世界举办一场咁大规模既电竞比赛，可以想像佢面对既压力绝对唔细。要知道成功既人从来都系少数，No Game No Life最精彩既地方，就系切中咗每个人都觉得自己系万中无一既少数，每个人或多或少都觉得自己只要努力，就会成功呢一点。通过作品满足咗大家既想像，却又令到大家都轻视咗现实生活中胜利既人面对既环境有几严苛。

一个绝对公道既世界就会唔公平，丛林法则弱肉强食既世界当然最公道，但却会令到大部份弱者得唔到保障。所以现代社会尽量都令到胜负唔分明，每个人都觉得自己系有才能而被埋没个个。但对于个啲真系每日都系胜负世界博杀紧既人，无论系体育同电竞，我地都不妨多从欣赏既角度，去支持佢地，支持香港既运动员。

（本文为投稿，稿件可电邮至iwanttovoice@hk01.com；文章纯属作者意见，不代表香港01立场。）