【英伦对决．影评】唔系动作片　主线系一个政治阴谋故事

读者冇耐性，比个结论你先。《英伦对决》 （The Foreigner） 照计唔会太收得，亦唔可以话好好睇。但算系有诚意，值得一睇。在我心中“值得一睇”已经系赞。人生苦短，好多嘢唔值得浪费时间。

讲返套戏，你点回避都好，点都避唔到要讲，成龙。亦系因为呢个原因，冇人肯同我一齐睇。成龙因为政治立场同言论，当然系好多香港人眼中钉。但无数咁多事实话你知，出去讲香港电影，甚至讲香港，人哋都只系会识成龙李小龙。你去纽约伦敦仲好啲，人地会识王家卫。去到科索沃瓦努阿图之类（我去过！真系去过！），你讲你嚟自香港，人地只会讲三样嘢： Bruce Lee， Jackie Chan， 同埋 Jet Li李连杰 （暂时仲未会讲最好打嘅马云， 同志仍需努力）

成龙电影，在而家嘅香港，系赶客嘅。即使唔计政治立场之类，大家，包括我，听到呢套戏嘅反应都系：喂大佬，仲打？唔好啦啩。几廿岁人，房祖名大家都嫌老啦，仲整佢老豆出嚟，唔好啦。亦都大把人抱住食花生嘅心态入场，睇你临老仲要吹啲打点出丑。 呢套仲要系“合拍片”（万达同华谊兄弟有份），更加赶客。

11年前我正系抱住同样心态，入去睇史泰龙（Sylvester Stallone）嘅 “洛奇：拳王再临”（Rocky Balboa）。好心啦，成百岁人仲打擂台，傻的吗？做多次Rambo都仲未癫够？ 但结果， Rocky Balboa非常好睇，直头系打脸。当初入去谂住睇龙哥出丑𠮶啲，应该感到羞愧。

呢个亦系我对《英伦对决》嘅睇法，黑心想睇成龙出丑嘅，应该感到羞愧。

表面上个故事好简单，预告讲得好白，唔怕剧透。恐怖份子炸死咗成龙个女，成龙单挑报仇。哗顶，中国超人？定耆英版救参96小时？（OK， 其实 Liam Neeson仲老过成龙）。 之前我都有睇成龙嘅《天将雄师》同《十二生肖》。好烂就称不上，但都系果句，好心啦， 几廿岁人，仲打打打……争在未好似在《神话》拍金喜善咁当自己系情圣。

但《英伦对决》真系唔系好同。佢唔系大爱国（无论英国定中国）故事，亦唔完全系慈父救女故事（成龙要救不如打鬼妹救左小龙女卓林先？）。套戏唔系冇动作场面，唔少。但主线其实系一个政治阴谋故事。

《英伦对决》就系一套有啲不伦不类嘅戏，话动作片又唔系，话political thriller又唔完全系，但原著小说《The Chinaman》都系咁上下，一方面讲英国嘅政治阴谋，北爱尔兰问题，爱尔兰共和军，政客为上位或自保可以去到几尽。另一条线就系主角为女复仇。

就算对成龙点冇偏见都好，都不能否认，其实政治𠮶条线好睇好多。皮雅士布士南（Pierce Brosnan）不经不觉咁老，好长时间我都仲当佢系占士邦。佢演得好，够深藏不露，收放自如，加上本身系爱尔兰人，演返角色先有说服力。至于成龙，就真系老态龙钟。但亦冇所谓，书入面都系咁，成龙戏入面甚至比佢现实更加苍老。而成龙亦唔系一打一百嘅英雄（虽然都好打得），亦唔会为老婆仔女忽然大爆发嘅Liam Nesson。你在佢面上，就只见到沧桑。呢个老兵经历嘅失去嘅已经太多（又，成龙现实都系咁）。

其他政治阴谋种种就唔剧透。但政治情节令套戏有一个问题。原著系写于1992年，𠮶时北爱仲系问题，爱尔兰共和军仲十分勇武。但事隔咁多年而家先拎嚟拍戏，就难免令人有啲难代入。留意套戏冇拍“𠮶个年代”，系设定返在现代，有手机有手提电脑。而家嘅贝尔法斯特（Belfast），应该和平过你去旺角。

外媒相当赞赏成龙嘅演出，认为好破格，唔系以往嘅醉拳小子谐趣角色，或超级警察一打一千，我认为外媒都系对佢太偏爱了。成龙不错系事隔几十年卒之有啲“演技”，佢演嘅角色同以前都唔同。但唔好话拎嚟同史泰龙嘅Rocky Balboa比，佢嘅演出甚至比唔上甄子丹在《追龙》嘅突破。而其实成龙师兄洪金宝好早已经在《八两金》证明自己识演剧情片。

所以，成龙nice try，但主要都系睇皮雅士布士南，以及种种政治嘅勾心斗角。你好易会tempted to think套戏冇咗成龙仲好，但冇左佢又真系唔完整，而呢个角色我又觉得佢演得称职。

（本文纯属作者意见，不代表香港01立场。）