【港姐2017．博评】只见Big Big Channel　再见香港小姐

今届《香港小姐》真系睇到我心都痛。

我冇夸张，《香港小姐》曾几何时（十年前都应该仲系）唔少香港甚至系华人社会女孩子羡慕嘅尊贵名衔，“美貌与智慧并重”系唔少女孩子嘅目标，位位香港小姐都为唔少女孩子同埋男孩子定咗标准，完美女人应当如此。“靓过香港小姐”、“咁靓女，去选香港小姐啦”系一代甚至系几代人嘅口头襌，但睇完今届《香港小姐》，真系叹句此情只待成追忆。

冇得睇内涵　只能靠外表

喺今年决赛之前，候选佳丽嘅芳踪近乎绝迹翡翠台，只得一个食住“撒娇 Mall 姐”余威嘅台湾特辑，其他所有宣传都迫晒落去 Big Big Channel。对今届《香港小姐》节目打咗个折扣，观众接触唔到各位佳丽，自然唔了解佢哋嘅性格同内涵，到两个钟头嘅决赛之时，就只可以单凭佢哋嘅外表去评分。

老实讲，我觉得历届港姐冠军好多时都唔系最靓𠮶个，如果唔系使乜有“最上镜小姐”？大家又点会用“大方得体”嚟形容港姐冠军？系因为以前喺“总决赛”之前，会有“半总决赛”甚至系“准决赛”，再加上频频现身喺唔同嘅节目，观众可以睇清楚各位佳丽嘅外表同内涵，而唔系好似呢几年咁，只系用两个钟，肤浅咁去睇吓一班佳丽外表。

刚刚出炉嘅冠军雷庄𠒇俾人批评到体无完肤，全部都系攻击佢嘅外表。唔系为佢讲说话，亦都为佢讲唔到好说话，因为除咗外表，我真系睇唔到佢份人系点。佢内涵可能好劲呢？但冇法，个节目都冇畀佢发挥。

珊姐，唔好管咁多瓣啦

两个小时嘅节目，有成一半时间都系为咗推广 Big Big Channel。综艺节目同埋 Big Big Channel 两边都系珊姐话事，自己帮自己天经地义，但真系做得好肉酸，管唔掂咁多瓣就放手畀人啦。

首先系𠮶个“Big Big Channel 最受欢迎香港小姐大奖”，本身系唔会出事嘅，因为佢都只系才艺表演环节。不过转咗个全民投票形式，以前用“TVB fun”，依家就喺 Big Big Channel 畀心心投票。惨就惨在𠮶个布景实在太 cheap，为求表达到 Big Big Channel 系直播平台，就真系照住直播平台啲布景嚟抄，冇理过衬唔衬港姐嘅格调。网上直播时不停摆 pose 同埋食嘢呃反应嘅桥段，居然可以照摆上港姐节目，我真系为呢班佳丽尴尬。其实可以继续 sell Big Big Channel 直播，但系换个高贵啲嘅布景已经唔同晒。

仲有港姐竞选必备嘅大型歌舞环节，今年嘅主角好明显系 Big Big Channel 嘅各位小朋友 KOL 同埋吉祥物“大明猩”。两小时嘅节目时间根本唔多，仲要喺呢个环节分畀 Big Big Channel，佳丽们喺自己嘅节目居然沦为配角，鹊巢鸠占，情何以堪？

评审机制出事　Do姐成箭靶

另外一个令到今届香港小姐进一步崩坏嘅地方，系个评审机制。由全民公投选三甲，缩到去由评审自己投明票去话事，已经系大倒退。唔系话民唔民主，因为香港小姐民主其实唔系好影响我，但观众嘅投入度就大大减退，香港小姐嘅认受性亦都大大降低。今届仲冇咗会计师去核实 Big Big Channel 啲心心数量，公信力更加低。

其实评审投票选出三甲冇话唔得，但问题系个机制太多讲唔通嘅地方。首先系各位评审各自都有自己嘅“学生”，咁佢一定帮自己学生，到投决定一票时，就算自己学生唔太好，都可能会因为“师徒关系”而投佢一票。虽然一早就堵塞咗呢个漏洞，唔可以投自己嘅徒弟，但“感情因素”都可以继续影响赛果，你睇最后草蜢因为支持好兄弟捆绑投票就知几咁儿戏（而佢哋都唔掩饰）。

另外，Do 姐身为“校长”可以喺打和时投决定性嘅一票，佢就更加唔应该有学生，但佢有㖞仲要有两个。另外，校长要投关键一票，之前普通投票时就最好冇得投，保持中立，依家有两票，仲要系同一班候选人度投，就连立法会功能组别都唔系咁玩啦，谂呢个机制嘅人真系要打。依家真系应验咗梅菲定律，最后真系要 Do 姐用埋校长额外𠮶一票去投冠军出嚟，有网民揶揄今届系“Do 姐小姐选举”，矛头直指 Do 姐。我希望大家睇晒成件事，Do 姐今次摆明畀人摆上台，惨！

三大骚彻底崩坏

不过点都唔够《香港小姐》呢个昔日金漆招牌惨。有观众话好耐冇睇大台，但《香港小姐竞选》就一定睇，因为系情意结。呢几年咁搞法，同观众嘅关系愈来愈疏离、香港小姐嘅认受性愈来愈低，呢个招牌冇晒金漆都不突止，我直头听到佢撕裂紧嘅声音。三大自家制节目《香港小姐竞选》、《劲歌金曲总选》、《万千星辉贺台庆》系唔少电视迷心目中嘅经典节目，近年做得几差有眼睇。连大台铁粉都含泪叫佢收档、“不如唔好再搞”，希望保住个招牌，真系惨绝人寰。

（文章纯属作者意见，不代表香港01立场。）