【爹哋哥手记】美国LL Bean鸭鞋最强　但二创鸭鞋唔系只只熟水性

世界上，有样嘢叫“似曾相识”。可能系抄袭，可能系致敬，可能系巧合，可能全部都唔系。问世间设计为何物？我爹哋哥先旨声明，唔系玩踢爆，唔好问点解，真真假假只要相信它。撰文：爹哋哥

近排打风打得密，骤雨多到得人惊，爹哋哥有个大忌——整湿对袜周身唔聚财，所以一知道有风雨，必定进入一级戒备状态。

鞋柜入面防水鞋，爹哋哥有好多，不过着来着去都系𠮶一对，即系美国百年老字号出品，LL Bean的招牌防水鞋Duck Boots。呢种原先为打猎制作的鞋款，既防水又防滑，所以深得户外友欢心，经历过咁多年洗礼，现在当然唔只登山涉水，行商场、睇音乐节都可以Duck Boots上阵，都系贪其够tough，唔使锡住着，加埋Made In USA的金漆招牌和一世永久保用的信誉（虽然爹哋哥好怀疑有几多香港人真系会send对鞋去美国整），襟着又襟兴的确一流。

以前有唔少人认定Duck Boots难Carry，但多得日本人点醒，配搭Loose Style的Cropped Pants、Denim，出来效果最好，反之一身Slim Style的话，头轻脚重的效果，相信唔使爹哋哥多讲，都估计到有几灾难性。

百年历史老字号经典设计，一定影响到不少后世设计，不过鸭嘴款式实在太Signature，所以无论点样变奏，最终出来都系会令人联想到LL Bean，呢种先称得上系超越时代的Classic。过去十年来，模倣、疑似的Duck Boots数之不尽，由大众化“一剔”、日本鞋老牌“月星”、到贵到飞天“V仔”都曾经出过，有Hi-End，又有Sporty，虽然外貌做得神似，但相信当中十居其九都无防水功能，徒具鸭样，却无鸭于水上游的本能，咁仲系咪可以叫做Duck Boots呢？爹哋哥深表怀疑。

现今世代，乜都样行先，功能呢样嘢，有就系Bonus，冇呢？照买是常识。正所谓“咪住，要唔要，由我自己拣”，买原创定二创Duck Boots自己话事，不过出手前可先重温一下近代二创“鸭史”。

始终LL Bean先系Duck Boots祖宗，出一款鞋出到大楼前放置巨型Duck Boots模型，仲有埋Duck Boots Car，相信无人会怀疑LL Bean在“鸭”界地位。

爹哋哥 PROFILE 人称西九龙He-Man。爱原创的创意，又爱翻版的创意。唔想成为时尚桥头堡，只想退休返骷髅头堡。