【公关工作】有表现升职快过直升机！一文看清PR Agency晋升阶梯
有一次喺活动场合，撞见多年冇见嘅同学仔，佢好兴奋拎咗叠卡片出嚟，话要同我交换。
同学仔：“咦！你唔系做PR咩？之前睇你Facebook 啲相，见你都系搞活动架！点解无啦啦转咗做account嘅？”
然后我就一头雾水，谂咗几秒……大概同学仔分唔清account同accounting嘅分别。我个title上面嘅account系指客户，而同学仔所谂嘅account，系accounting会计嘅简称，真系大缆都扯唔埋。
Agency职位阶梯
AE （Account Executive）客户主任
SAE（Senior Account Executive）高级客户主任
AAM（Assistant Account Manager）助理客户经理
AM（Account Manager）客户经理
SAM（Senior Account Manager）高级客户经理
AD（Account Director）客户总监
Agency虽然有晋升阶梯，但就冇乜阶级观念嘅！全民皆兵，有起事上嚟，仲理得你边个AM定AD咩？大家同坐一条船，一齐拆弹啦！只要大家主动谂下可以点做、点解要咁做、点样可以安排得更好，你嘅表现，大家都一定会睇到嘅，话唔定升得快过直升机呀！有时啲人做到咁上下，又会转下做in-house，过档去客人度帮手，负责对返agency。其实都冇话边样好，边样唔好架，大家不妨都计划下！
职位同功能
AE（Account Exective）客户主任
工作年资：1-3年，应届毕业生都会考虑
主要职责：
做资料搜集、做competitor review、做clipping report、揾vendor报下价、做下跑腿、翻译下中英文、写下新闻稿、call下记者等等。可以话系公司入面嘅妹仔角色，大家有乜嘢都会叫你帮手做，execution比较多，比较被动。例如系下昼开会需要用到嘅文件，你要负责整个powerpoint出嚟，活动前后帮手执下嘢，pack下箱又或者出下courier呢啲湿星嘢，系就系湿碎啲，但都学到好多基本功架！做起活动上嚟，我敢讲，呢个角色都好重要，条team冇咗你真系唔得掂，所以千祈唔好睇小呀！
SAE（Senior Account Executive）高级客户主任
工作年资：3年或以上
主要职责：
部分AE嘅职务，SAE都要做，揾资料，做clipping report、揾vendor报价、翻译中英文、写新闻稿、call记者等等，当然可以叫AE帮手分担一下，呢个时候系进化到，你可以叫AE帮手做起个底先，你再去comment或者edit。SAE会有跟开嘅account，开始同客人接触，如果project唔太复杂，可能可以直接同客人联络添。有时开完会，可能可以直接同客人拎啲过往嘅reference，或者相关资料畀我哋做下一步嘅建议同安排等等。亦都因为有啲经验，可以开始做到少少planning嘅工作，即系proposal之类嘅嘢，做完再畀上司comment。
AAM（Assistant Account Manager）助理客户经理
工作年资：4-5年或以上
主要职责：
同客人沟通，知道对方要求。要plan下活动，以及唔同project嘅内容、流程等等。要分配工作畀同事，将同事畀嘅资料整合，睇下有冇出错，有边啲位需要加补充资料等等；mon住各个project嘅进度，确保所有嘢都系on schedule。仲要同上司汇报进度、遇到唔同难题嘅解决方法或建议等等，唔再系斋做唔使谂嘢嘅阶段喇！
AM（Account Manager）客户经理
工作年资：5年或以上
主要职责：
要同客人沟通，得闲吹两句水，做下朋友，就对方嘅要求评估可行性同提出建议。要plan下人手分配，睇下活动同project嘅内容、流程安排妥唔妥当。公司要请人嘅时候，都要同求职者做下面试。事无大小，都一样要mon住进度，确保project可以顺利进行。有问题就梗系要第一个企出嚟分析，谂下点拆。讲真，如果真系有镬爆，客人都会揾你嚟诈型同照肺，所以唔好以为升咗职就可以咩都唔理。
SAM（Senior Account Manager）高级客户经理
工作年资：7年或以上
主要职责：
同AM做嘅嘢分别都唔算好大，一样要同客人沟通，做下朋友，建立关系，抛下啲新嘢出嚟，试探下客人接受程度，啱嘅就send份proposal过去睇下有冇合作机会喇！去到呢个level，净系对外系唔够架，仲要对内，了解同事嘅需要；带啲士气畀同事之余，仲要代同事发声，同人头倾下加人工，加下福利咩都好啦，总之就要有担戴，如果唔系都唔使旨意啲细嘅同你落力。
AD（Account Director）客户总监
工作年资：10年或以上
主要职责：
较复杂嘅活动通常都会系AD in charge返，大部分同客人嘅沟通往来都系AD自己处理，所有文件系send畀客之前都会由佢把关。要睇下project进度，要就住客人嘅评价，同同事检讨有乜嘢不足，点样可以做得更好。亦要同SAM、AM倾人手安排，知道各员工擅长做乜，弱项系乜，以便人手分配。凑客之余，更要汇报project进度畀老板知。有时老板唔得闲出去social，就要去埋佢个份㗎喇！有机会仲要去下啲商业聚会，睇下有冇新客源。同客人关系梗系要好，在公在私都要约下食饭，知道下客人嘅发展，乜都倾下，亦客亦友，如果唔系，边得嚟咁多客识咗十几年都仲咁friend，转咗工都继续揾你帮手先得架！
（戴返个头盔，以上纯粹个人经验，因为间间公司都有自己嘅一套晋升机制嘅！）
公关百宝袋：
Competitor review
所谓知己知彼，百战百胜！PR同marketing都要观察住竞争对手做过乜嘢主题、做紧乜活动同嚟紧有乜新动向，所以都会做竞争对手报告，方便自己同同事们了解市场现况。
Vendor
Vendor即系用钱聘用服务或者购买产品嘅供应商，例如印刷、活动中嘅台、灯、声制作，或者到会服务等等。
《公关妹仔手记之挑战PR地狱》
作者：关公妹仔
出版社：非凡出版
立即下载《香港01》，紧贴公务员职位空缺、劳工处笋工推介，了解CV、面试致胜技巧！ 下载网址： https://hk01.app.link/bkbJyY5t4O