【面试攻略】面试官故意为难？ 教你拆解八条难答问题！
又到三、四月的转工潮，各位打工仔，你们想跳槽吗？无论是跳槽抑或职场新鲜人找工作，总要面对的是寄履历表和面试这两个程序，有时候遇到十分难回答的面试难题，该怎么办好呢？以下有八条让人非常为难的问题，你们看看思考一下，该怎么回答，我再揭晓谜底吧！
【文章原刊于01撑场，欢迎下载香港01 app，与星级作者一同讨论喜爱话题。】
Q1、如果你今次面试唔pass，你觉得会系乜嘢原因？
A1、通常问得呢个问题，就可以肯定面试官仲未fail你，仲想试吓你嘅真章先再决定。
呢个问题有危亦有机。有危，因为你可能会唔觉意讲咗一啲面试官唔知嘅短处出嚟。举例嚟讲，如果呢个面试系用中文进行，你又同面试官讲话自己英文唔好，咁就无端端向面试官介绍咗自己嘅新短处，对自己不利。咁机会又喺边呢？如果头先你答嘅问题系答得唔够好嘅话，你就可以借呢个机会，话头先条问题答得唔好，然后即刻再答多次补镬。
Q2、我哋只系一间细公司，点解拣我哋？
A2、其实每一间细公司嘅老细或者管理层都有一个心愿，就系希望自己间细公司可以搞得起。细公司资源紧绌，人手不足，唯一可以畀到你嘅就系一个发围嘅机会。所以佢哋都好希望有一班有冒险精神嘅人一齐挨。
你可以讲吓点解呢间细公司有潜力爆得起，同埋呢间公司畀到咩独特嘅机会你，吸引到你加入。讲嘅时候最好配合积极嘅神情语气，好似已经准备好去挨一段苦日子咁样。
Q3、你最大嘅成就系乜嘢？
A3、如果你有一啲同工作直接相关嘅成就，梗系讲出嚟啦！仲要讲埋可以点样套用喺实际工作之中。但残酷嘅现实系，大部分社会新鲜人都冇呢啲成就。
咁究竟讲乜好？我建议你扭一扭个问题，讲自己曾经点样克服自己嘅短处或者困难，然后从中得到领悟。举一个例子，你可以话细个𠮶阵好怕黑，唔够胆熄灯瞓觉，但系有一次终于下决心，觉得人哋做得到，自己都应该做得到。于是就鼓起勇气熄灯瞓觉，果然自己可以好安然咁入睡。呢次成功经验畀到自己好大嘅勇气去克服之后嘅困难。
Q4、讲一个你失败嘅经验畀我听。
A4、失败经验唔一定要同工作相关，亦唔一定要近期发生嘅。最重要嘅系你从失败之中学到嘢，避免以后再犯同样嘅错。
呢个失败经验最好系好耐之前发生，咁面试官就会放心你已经得到改进。你可以用“小故事，大道理”嘅方式去应对，举例嚟讲，你可以话小学嘅时候曾经有一次考试，所有问题都识晒，但系唔记得写名，结果𠮶次考试老师就畀零分。之后你就学识咗留心细节嘅重要性，因为有时一个细节出错，可以导致全盘失败。
Q5、而家后生仔都好着重work-life balance，你喺呢方面有乜睇法？
A5、呢个问题，如果你答好着重work-life balance，面试官一定会觉得你好冇上进心；但如果答你愿意为工作牺牲所有，面试官又会觉得你个人傻傻哋，唔会想请你。
咁点算好呢？其实我哋不如换个角度睇，每个人都钟意work-life balance，只不过喺各个人生阶段有唔同嘅需要。如果你将事业睇成一整个三十年嘅过程，咁你头十年拼命去work，奠下稳固嘅根基，之后𠮶二十年咪有life啰。讲真个面试官自己咪又系咁，后生嘅时候拼命去搏，而家咪又系想准时收工。
Q6、基于你对我哋公司嘅认识，请你讲吓我哋公司可以改善嘅地方。
A6、千祈唔好听到面试官咁问你，就直肠直肚咁讲晒出嚟。如果你将公司以往做得唔好嘅嘢眉飞色舞咁讲出嚟，肯定会直接或者间接咁得罪面试官，佢仲有机会觉得你会周围唱添。做得面试官，肯定喺公司位处中层或以上，而且工作日子亦都比你长。你要知道嘅系，如果公司有嘢需要改善，而现阶段又冇改善到嘅话，就系高层嘅失职。咁如果面试官畀你喷到一面屁，佢对你印象肯定唔好啦。所以为咗唔好得罪面试官，最好讲一啲啱啱发生嘅市场变动，然后去提出公司可以改变嘅地方。因为既然呢啲系新嘅市场变动，咁高层就算乜都冇做都唔算系失职啦，咁你咪可以畅所欲言啰。
Q7、你觉得自己今次面试表现系点？可唔可以评价一下？
A7、呢个问题无论话自己表现好，或者唔好都好容易堕入陷阱。最好嘅答法就系答得模陵两可，话自己今日嘅表现同喺屋企嘅练习水准差唔多，亦都可以顺带一提头先答得唔好嘅地方，再补充多一次，转危为机，抢返失去咗嘅分数。
Q8、你打算喺公司度做几耐？
A8、所有雇主都希望员工稳稳定定咁做嘢，所以呢条答案嘅精神一定系“永远咁留喺度”。当然，如果你直接咁样讲要永远咁留喺度，呢个答法又太过天真无知。所以我哋可以修饰一下，例如话如果公司理念继续同我嘅理念系一样嘅话，我唔会离开。用咁嘅方向去答就成熟好多喇。
希望以上这些资讯可以帮助到大家，全部节录自半宅职薯写的，由非凡出版制作的《职场呕血夹心层》，这位仁兄好像也有在HK01供稿呢，请多多指教！
撰文：职场一哥
【编按：文章题目为编辑所拟，原题为“面试总会遇到不懂回答的问题……”】
（以上文章内容均属用户提供，香港01不为任何用户内容而衍生或遭受之任何损失或损害承担责任。）