【博评】围炉有害健康：唔好以为你个Facebook就系全世界

唔好只系信你自己Facebook，唔好以为投第个阵营嘅就系港猪、掌心雷、老人院、新移民、蛇斋饼粽……唔好见人讲嘢你唔啱听就话人标题党。我识成班阿叔都投畀容海恩，亦唔系掌心雷，不过人哋唔会上网话你知。

好少写政治，朋友话斋政治如睇波，大家围炉取暖最过瘾。对面𠮶条友硬系唔顺眼寸寸贡踢到条鞋带就碌几个圈扮晒嘢，自己就梗系畀球证针对。我钟意睇波，但讨厌政治（如果呢样已经令你唔舒服，我建议你唔好睇落去）。

我好抗拒各种标签，我照计唔系蓝丝亦唔系黄丝。讲“政治光谱”，我投票投郭家麒涂谨申。有多票我可能投朱凯廸。但我系咪泛民？又未必系。如果有王维基我会投王维基。我甚至唔介意投自由党，不过我区自由党侯选人一早去咗欧游（而事实欧游前我不知道周永勤是谁，所以都唔会投）。

“我系乜”难答，“唔系乜”就比较易答，基本上肯定唔会投嘅，民建联啦，各式本土派啦（朱凯迪不在此列，不赘）。不过我有不少本土派朋友，固然个别已经反面，但仍有不少维持住“各自表述”嘅状况，亦有少数仲会真心交流而不伤感情嘅。

兼听则明　与本土朋友对谈

文首讲到，成班自己围炉最过瘾，特别系政治同睇波。但想提升自己水平，同埋想练大自己心脏，唔想咁易畀人激到爆血管嘅，听唔同立场嘅人讲嘢，系几好锻炼。选举后，我同一位本土派朋友倾过吓，以下系我听完佢意见嘅演绎：

本土派朋友认为，首先人人应该远离互联网，停止围炉，唔好以为你个Facebook就系全世界，听多啲唔同意见——我估正系呢点，令我哋做到朋友。

兼听则明，讲就容易，但往往所谓“唔同意见”，系“同一意见下嘅不同意见”。捧德国嘅听下第二个德国球迷嘅意见咁上下，而唔系去听英格兰球迷意见。社交网络制造“回音室效应”，大把人讲过。唔好只系信你自己Facebook，唔好以为投第个阵营嘅就系港猪、掌心雷、老人院、新移民、蛇斋饼粽。

Fact：排通顶嘅太古城票站，18%人投畀叶刘淑仪，高过港岛平均。当然你一样可以话太古城票站好多投泛民，但两者冇矛盾，唔好见人讲嘢你唔啱听就话人标题党。我识成班阿叔都投畀容海恩，亦唔系掌心雷，不过人哋唔会上网话你知。

朋友亦同时认为，本土派呢个槪念，已经玩完——本土派定义人人不同，佢只计青年新政同热血公民。

但我有点奇怪，拎到3席都仲玩完？

佢意思唔系“本土派嘅候选人”玩完，但“本土派”呢个概念，见咗底，好难再谷到新嘅支持者出嚟。港独，中港区隔，驱蝗之类乜都出晒，冇得再尽的了，个饼唔会大到几多。而呢3个议席，大家亦深知唔会推到乜。剩返嘅，除咗配票（但对本土派应该冇乜关系），就系抢票。即系，抢传统或激进泛民嘅票。而在呢个过程中，必然就系你妥协，变为冇咁激进——而事实你见选到嘅几个本土派，都系相对地比较“入屋”的。

第三，谷到去58%投票率，特首民望又咁低，应该乜民意都谷晒出嚟。

投票率上升空间唔大（呢句我讲嘅），而民意亦都好清楚话你知：香港人系稍为pro-反建制，但绝对不能急，不能激，你再闹都冇用，你Facebook日日闹港猪都冇用——《满城尽带黄金甲》话斋，“朕不给，你不能抢”。主流选民用选票话你知，佢哋要泛民，但只系新泛民，甚至唔系激进泛民。本土嘅，都系要“冇咁多棱角”。所以你见上位嘅，系刘小丽，罗冠聪，游蕙祯，甚至系集左胶同勇武本土于一身嘅朱凯廸。香港人都系和理非底，选罗冠聪朱凯廸好激进㗎啦，慢慢来吧，你等唔到？都系要再等。

但又同样地，中间路线，温文路线，未必易做。冯检基下马，王维基方国珊都选唔到（我补充：其实唔系争好多，但只怕下次争更远，如果仲有下次），汤家骅堆民主思路更加系冇人理。

上少啲网　跳出回音室吧

再重申，个饼真系再大唔到几多。建制嘅铁票都似乎见顶，佢哋可以协调好啲，但似乎冇乜新票再走出嚟。上面讲咗其实本土派都系咁上下。真系叫做Strike Back嘅，系传统泛民。未来10年你都唔会见到民主党少过5席，睇少啲《伪民主派卖港实录》，围少啲炉。

雷动计划虽则畀人闹到九彩，甚至“受惠”嘅民主派都闹，但，威力系有嘅，亦令之前好多所谓“科学”估计结果错晒。因为啲选民始终系人，唔系量化模型下嘅粒子，可以畀你蒙地卡罗（指Monte Carlo Simulation）咁掟嚟掟去。你睇邝俊宇最后关头吸嘅票，几乎多到踢返走涂谨申。人嘅行为当然都可以“量化”，但绝对唔系咁易——至少你要了解戴耀廷嘅心水先。

冇用嘅系地区工作，真系冇用的，好多空降嘅都当选，同时间好多所谓深耕细作搞民生嘅都选唔到。有用嘅系选举论坛，本人（同埋我朋友）都对选举论坛深感厌恶，水准之低真系够做国际笑柄。但不能否认，唔好以为你个世界就系全世界，好多人一路闹一路睇，亦因为论坛嘅表现对候选人加分减分。最好就系剪到有sound bite，好似K.O.人哋咁，本人厌恶嘅刘小丽高票当选，论坛都功不可没（而to be fair，唔讲立场手段，刘小丽讲嘢嘅技巧，辩论嘅功力，都比绝大多数候选人为好）。

最后，乜阵营都好，乜人都好，唔好围咁多炉。Keep your friends close and your enemies closer。叫你买份左报睇应该太匪夷所思，但上少啲网，其实唔难。当然有啲一开始已经觉得正邪没有中间，反对我嘅都系港猪嘅，就祝你好运。泛民都围炉围咗好多年，先学识入屋做地区，先知唔系卖“民主”两个字就有票自动送上门，再用咗N年先开始学识配票。

（文章纯属作者意见，不代表香港01立场。）