【重口味慎入】那日在温泉，我浸到月经杯都“消失”
同老板开会，压力真系好大。你有压力我有压力，有人会流汗，由臭狐发出想散会嘅有味抗议；有人会跳草裙舞，卖笑不卖肉，氹老板开心，搏早啲完会；而内敛嘅我，只会安静地收缩阴道。冇错，系收缩阴道。点解？因为我有用月经杯啰。其实一般女生都不太了解长年不见天日的黑洞，最多M到时会感觉到子宫收缩，但阴道收缩，冇用过月经杯真系听都未听过。那日开完会，我9秒9狗冲出会议室，同同事讲：“大镬喇，我太紧张个杯好似塞到好入……”
撰文：Miss Sex 2.0
冲到入厕所，一如所料，月经杯果然入到有两节食指咁深。不过我经验老到，冷静下来立即做个半踎姿势，再将食指同中指螺旋形咁扭住，揾返个月经杯底部。三两下手势，将缩起嘅月经杯拉返落嚟。
其实我以前并非如此了解自己的隧道。我甚至以为，用过直径有1.5厘米嘅月经杯，用完之后，阴道以后都可以用来打保龄球。天真的孩子一夜长大，而我嘅天真，其实是被温泉洗去。
来潮浸温泉 好在有个杯
话说，之前我与闺蜜相约去台湾短游，特登book间有私家温泉房的靓酒店。点之两个人竟然一上飞机就一齐“见血”……
车！M到之嘛，驶乜惊！好彩上个月买咗个月经杯看门口，而闺蜜就用开棉条，大家咁熟，决定来个“血盟”，照浸温泉！
其实，跟闺蜜相识有10年，感情虽然好，但今次要赤身露体相对，都系一大考验。但我万万估唔到，更大的考验喺阴道等紧我。
话说，温泉浸到尾声，闺蜜先上水抹身。点知，一上水已经有几条血柱由大腿内侧流落嚟。我望咗一眼即刻低头以免闺蜜尴尬，佢爆完粗就死死地气处理“凶案现场”。原来棉条吸水太多，不胜负荷。棉条浸温泉系唔work！当时，我自以为用月经杯系威威之举，皆因月经杯就唔怕吸水太多，亦唔会怕感染，只要浸之前倒咗啲血就得。所以我沾沾自喜咗一阵先施施然从温泉出浴，顺手清洁一下月经杯，叫闺蜜唔好望过嚟。
消失的月经杯？
我伸只食指入去摸下个杯喺边，心凉咗一截……平时伸一只或两节食指已经揾到，家阵伸哂成只都唔见，唔通个杯入咗时光隧道？
我真系傻猪猪，我点解会谂唔到温泉会加快血液循环，令阴道充血收紧将月经杯推到子宫方向？死啦，唔通我要喺台湾揾妇科医生“拔杯”？定系等到今晚阴道放松，慢慢瀡返出嚟再揾过……咁会唔会充血太多有病……当时我紧张到已经无法正常思考，遇到类似情况，其实系应该放松身体，尤其系阴道嘅肌肉，然后用深蹲或单脚跨坐，总之系最舒服就手嘅姿势取出月经杯。再唔得先至揾信任嘅朋友或者直接去睇医生。可惜，当下我已经“震都手埋”咁踎喺地下（因为踎可以令阴道打开多啲同易用力啲），用中指尽量伸到最入揾，终于，掂到个杯尾喇！个杯似乎系比水压到歪咗少少。但系，只系掂到个尾，我又可以点拎返出嚟？横死掂死，我用埋姆指、食指一齐武力对待！唔得，好很痛。
我望望头先血流成河、但呢刻已经整理好仪容嘅闺蜜，口震震咁问：“你可唔可以……当自己系妇科医生咁，帮我揾啲嘢？”
顺带一提，闺蜜系女同性恋，所以我先觉得佢可以帮到我。如果系一般直女，可能好似以前嘅我咁，连自己阴道同尿道都唔识分，又或者系男朋友，揾完之后以后都唔驶旨意搞嘢，我就即刻搭的士睇医生。
闺蜜义字行头，二话不说叫我瞓低，然后两三下手势，就夹到个杯出阴道口，再叫我自己拎返出嚟 ，松一口气。事后佢得戚咁竖起食指同中指，摆出类似《神探伽利略》手势，话平时用开，熟手无难度。
为环保之余，谂清楚先好用
经过呢个真.血盟之后，我同佢嘅感情又进一大步。闺蜜冇畀我吓惊，反而都想试用月经杯。上网睇到，好多用月经杯嘅人都会力赞佢环保，又冇即弃卫生巾化学物质混合血嘅咸鱼味，但我就咁谂：
假如你阴道肌肉好发达，你就要警剔一下个杯会唔会畀肌肉挤得太入；
如果你连自己阴道都唔知系边，唔该你揾好位先；
又或者觉得掂一掂都会受伤，就用棉条过渡下先；
如果你钟意做水晶甲，亦未必适合用；
如果你系处女，又觉得只要有外物入侵就等于被“破处”、又会介意的话，咁就等真系自然发生后先用啦；
当然仲有，唔好浸温泉（妇科医生又话，经期间女性抵抗力相对减弱，比较容易受到细菌感染。）
不过，月经杯好处的确多箩箩：唔洗好似尿片咁焗住，用咗好似冇用；几乎无臭，因为经血冇乜接触空气产生细菌，亦冇同卫生巾上嘅化学品混合而发出异味，所以血倒出嚟，同普通血冇分别。你甚至可以观察经血颜色、同血块多少，评估最近身体状况。
有朋友话：“用月经杯系重新认识自己身体。”所言甚是也。M巾令女士们滴血不沾，但月经杯唔单止要你做血手屠夫，仲可以大概认识自己阴道结构。而只要对身体足够了解、懂得适时放松肌肉，你就会发现：“月经杯又有咩好怕㖞！”
【性诞快乐】闺密 girls' talk：人有三急，口水当润滑剂得唔得？
我一直以为阴道就只系一个通道，为来经、性爱、生仔。除此以外，佢系“冇生命迹象”嘅器官。喺用月经杯之前，我仲问过“用完会唔会松”嘅傻话。而当你发现，原来同老板开一场会，已经可以令你个杯缩到咁入，你就知道阴道生来不只为进出。