【不懂撒娇的女人．来稿】有一种同事叫“犯众憎”

话说小明近排听到好多同事讨论紧大台套九点半电视剧。女嘅就钟意讲贱Han有几贱，Saving有几正。男嘅就会讲下琴晚边个俾边个咀咗——肉紧程度犹如自己系男女主角一样。虽然故事系以爱情／撒娇为核心，但势估唔到，大家反而觉得剧中嘅职场厮杀场面更有睇头，更有参考价值。

文：好唔打得

何解？事缘小明公司最近嚟咗件极品。英籍女士，年约60，拥有已故女星沈殿霞嘅身形 （sorry no offence）同埋夏蕙BB嘅造型（简直无得输）。我地暂且叫佢做L姐吧。

其实外貌都系小事。但最厉害嘅系L姐竟然可以集齐晒剧中每位角色“好打得”嘅个性。

1. Mall姐嘅霸道

正所谓新官上任三把火。L姐为咗要表现出自己几有领导才能，几有威严，一返工就已经霸气十足。

例如，一开波就下令佢条team所有人未来半年都唔可以放 sick leave。无错，我系讲紧“sick leave”。

同时，作为公司嘅中层／medium potato，佢竟然要求各部门主管每朝早要向佢老人家会报。最后因为冇人show佢，L姐只好发烂渣咁叫老细炒晒佢哋。Oh my god! 连老细都O晒咀！

2. 贱Han嘅语言艺术

L姐同贱Han个把口可以话系不相伯仲，所以每次开会都会道出惊为天人嘅说话。

好似有一次，佢当住个Marketing Director 面前问CEO - 点解公司冇人做Marketing嘅？我地不如开番条Marketing Team啰？

而其余时间，L姐嘅发言从来都系离不开自己有几醒，以前有几风光，同埋大家应该要点尊重佢。如果唔buy佢嘅就系因为你太废或者对佢唔够了解。

3. Gordan哥嘅傲气

其实Gordan哥真系几完美。如果一定要讲，佢唯一嘅缺点就系太自信，同埋喺上司面前成日郁啲意就摆大老板个名（游生）出嚟，咩都话要直接请示游生。

系！我知你同大老板好熟，但并不代表你可以当自己阿头冇到。喺职场入面，越级打小报告系大忌。虽然员工手册冇写，但落你上司面只会令你一世冇运行。

4. 田蜜嘅美貌（系自以为）

L姐最可爱嘅地方就系觉得自己好靓，好正。

虽然大家对佢嘅感情生活一啲兴趣都冇，但佢遍遍就钟意周围同人讲自己几多人追。好似现在喺欧洲一个高级ski resort都系佢ex为佢以命名，犹如尖沙咀 The One 一样。

最惨系有次小明同佢出trip，L姐静静鸡同佢讲话附近有位似貌Brad Pitt嘅型男用眼神调戏紧佢 - 救命! 而呢个情况发生咗唔只一次，所以成个trip小明都唔敢对L姐有任何眼神接触，费事好似Gordan哥咁俾人屈。

可想而知，以上嘅例子好快咁成功令L姐攀升为公司“犯众憎”list嘅榜首，成为公司每一日最hit嘅话题。但系L姐大人物嚟㗎嘛，根本志不在此，所以琴日决定毅然急流勇退，离开公司，结束两个多月来璀璨的“犯众憎”生涯。

但最奇怪嘅系，当小明知道之后，佢竟然无即时开香槟庆祝。点解？虽然佢哋两个绝对唔称得上系朋友，但小明心知，其实L姐绝非系一个大奸大恶嘅坏人。佢认为，L姐所有嘅举止行为都源自于佢严重缺乏安全感同埋自卑。所以成日要话俾人听自己有几好，几叻 - 去证明自己嘅存在价值。

试谂吓，一个60岁嘅女人仲要出嚟抛头露面／搲烂块面，你估真系好过瘾咩。

所以我成日都赞小明又靓仔，又EQ高。唔知大家同唔同意呢？

（本文为投稿，稿件可电邮至iwanttovoice@hk01.com；文章纯属作者意见，不代表香港01立场。）