让我们助ThisAV追上Pornhub，点亮香港嘅未来

小故事一个：1990年，有位血气方刚嘅少年，好开心卒之等到其他屋企人去几日旅行。少年并冇叫女朋友上嚟啪啪啪，因为佢冇女朋友。不过佢拥有更美好嘅嘢：老豆嘅珍藏北欧AV录影带。少年唔止睇一次，直头睇到识背对白（北欧片都讲英文，OK？），因为唔知孤寒定专一嘅老豆咁多年都唔买新带。但唔使惊屋企人忽然返嚟，可以全无压力下咁睇，少年还是感到很爽。

然后你估到了，Murphy's Law，食带。少年同陈易希一样住屯门，但毕竟冇𠮶种拆烂嘢嘅发明家天份。少年拆开部录影机，研究咗几日，最后当然系越搞越衰。后来全家返嚟，纸包不住火，少年话落去食嘢夺门而出。到佢食完一件餐蛋治返屋企，录影机已修好。打后咁多年冇人再提过部录影机，直到今日。

对，个少年当然就系我。事隔差不多三十年，科技日新月异，求其一部旧款智能电话都劲过当年成个太空总署嘅电脑。唔怕人闹嘅，而家睇AV，开住会睇又得，食住饭睇亦得，绝对自己话晒事。想停就停，唔怕食带。

在香港，就胜在有thisav （而唔系ICAC）。谂下有乜土产科网可以扬威海外？ 除咗9gag，openrice（都窄窄地），以及141外，就系thisav。Thisav系中文网站，但主要流量反而嚟自日本，日本人都要“礼失求诸野”，去香港网站睇返日本AV，值得香港人自豪。蔡东豪有一排成日讲“温布顿效应”，thisav系完美示范——香港基本上不产AV， 但有最强嘅AV网。

Thisav幕后搞手神秘，但灵魂人物系个土生土长嘅香港80后。而听闻佢系唔多睇AV嘅，正如毒贩嘅仔女当然唔吸毒，Steve Jobs嘅小朋友亦都唔用iPad。

冇上过thisav嘅纯情网友，咁我解你知，“即系好似Pornhub咁咯”，明冇？讲白啲，就系同Web2.0对应嘅Porn2.0。用家产生内容，网站只系提供平台，你放珍藏北欧片上去怀念老豆又得，你去北欧自拍亦得。

小弟想写呢个课题好耐，但触发点就系早几日起身，打开YouTube，自动推荐我睇德国对英格兰足球友赛精华，很好，估到我想点。然后到我睇thisav （一起身唔可以睇的吗？），见到基片广告。搞乜？

以下想讲嘅，系如何令thisav做得更好。我以龙头Pornhub为鉴，对，香港人梗要Dream Big。一定要讲清楚，以下只系提议，真心想make thisav a better place，绝非“批评”。毕竟我一个仙都冇比，有乜资格批评？而我睇完“澳门首家线上赌场上线啦”嘅广告亦冇去帮衬。

1. AV正名行动

首先，潮流兴大数据，大家产生数据，先由高登发起嘅“AV正名行动”开始。 建设网站靠大家，薯片话斋，信一个人，不如信每一个人——咁你班仆街就系信唔过嘛！Thisav上面嘅片，杂乱无章，有时睇完成套都唔知边个主角，觉得好睇想揾“延伸阅读”都唔易。就因为上载嘅人乱咁嚟，冇话跟返片名编号主角名字等等格式。有时只上载编号都还好，有心唔难揾到其他资料。最大剂系有啲只系叫“极品学生妹”“新人”，甚至系啲完全唔明白咩意思嘅中文字，点搞？高登仔提议用写论文嘅APA格式，但讲到尾，都系要大家自律，否则一切免谈。Pornhub用家在呢方面的确做得比较好。

2. 做好排行榜

有晒数据，就万事好办。之后当然系各式嘅排行榜、分类。而家thisav唔系冇，但做得唔好。我上次为写《捷克AV点解有量又有质》篇文就上Pornhub揾资料，人地唔止列出唔同主角嘅作品，甚至每个国家边个最热门都话你知。我估你都想知韩国人睇乜吧？（可能系睇叶子楣，隔离饭香嘛）

3. 个人化推介

唔好向直男推介基片，正如唔好向基男推介直片。Pornhub直头有应用算法（algorithm，geek男听到呢个字已经兴奋）嘅 Porn IQ，为你度身订造今次睇乜好。基于乜？ 可能系你本身设定 （例如本人唔钟意鬼妹），可能系时间 （半夜睇啲静啲嘅唔好扰人清梦？），地点（入乡随俗，去韩国就睇韩国片？），甚至基于你睇咗几耐 （睇得太耐嘅就比啲重口味嘅你先满足到）——一切都系算法，you name it。

4. 举办大感谢祭

2015年，丹麦有位少年好似我当年咁，睇紧Pornhub但阿妈走上嚟又熄唔到机，唯有整烂部手提电脑。不过佢比我好彩，Pornhub知道呢件事后，为咗表扬呢个忠实粉丝，就送过部新嘅电脑畀佢——不过上面全部系Pornhub嘅logo。有理由相信系自编自导自演嘅行销手法，但我听到呢个故事还是觉得好感动，想起当年有几个俄超辛尼特（FC Zenit Saint Petersburg）球迷，由圣彼德堡开咗15000公里车去海参崴作客，点知架车跪低咗，辛尼特送过架新车畀佢地，一样一时佳话。

5. 做善事

睇片以外又点？其实AV网站有千千万万嘅可能性，远超你想像。Thisav都做咗唔少，一向都在社会同政治上企到好前， 马尼拉人质事件佢会致哀同叫你捐钱， 学民反国教佢停站一天声援学生，港大校委会议录音都有人放上去（因为有禁制令）。但，其实可以做嘅，仲有好多。

PornHub在纽约搞过Boob Bus帮乳癌基金筹款，仲帮人免费验乳，怕丑嘅亦教你返屋企自己验。之后再搞咗个Save the Boobs嘅活动，只要你睇“巨乳”或“贫乳”嘅片就帮你捐钱。男女平等？之后有个活动，睇“巨雕”都帮你捐钱，不过系植树日帮你种棵树。香港大可以搞个“植树姆指”日。

6. 自己出品

除此以外，Pornhub仲走出2.0，自己拍埋戏，好似Netflix咁。佢想拍一套Sex in the space，听名都知科幻。在香港大约会变成Sex in HKU Space。哪有钱？薯片都识搞众筹啦！应该好过夹钱买咖啡机。

唔自己拍，同人一齐拍又得。个个话支持港片嘛，咁但香港人身骄肉又贵，唔通下海打真军咩。唔紧要，冇话一定要拍AV。2013嘅《性人君子》（Don Jon），一线型男索女Joseph Gordon-Levitt 同Scarlett Johansson主演，在IFC上，绝对登大雅之堂，套戏嘅监制就揾咗Pornhub合作，男主角日睇夜睇。港产片绝对可以同thisav合作，好过豪情3D睇杜汶泽。

7. 出埋配件

要讲落去，仲有好多。Pornhub甚至有出360度嘅影片，将VR（虚拟现实）技术用得淋漓尽致，仲出埋可穿戴装置（Wearables）——其实系一条手带，畀你边睇AV边发电。点发电？都话手带咯……

文首讲过睇完套戏都唔知边个主演十分冇瘾。会唔会好快用面部（或其他部位）办识可以认到AV演员？咁就唔使大家次次人手输入。睇戏唔知演员讲乜对白又系冇瘾。会唔会其实好快用声音办识都认到？反正AV对白唔多，嚟嚟去去都系𠮶几句，而观众唔会介意你译错。

作为中文AV网站，thisav 已经落后Pornhub不少。实在唔容许我地再休养生息hea足多五年。众筹好，义工好，办法总比困难多。正所谓凭一口气，点一盏灯；念念不忘，必有回响。靠住呢啲欲火，呀，系灯火。我相信我哋必定可以点亮香港嘅未来。

（文章纯属作者意见，不代表香港01立场。）