拾荒妇黄月娴哭诉揾工遭歧视　冀长者工作有尊严（附发言全文）

立法会福利事务委员会今（2日）举行公听会，讨论“检视本港贫穷情况及订立灭贫目标”的议题。会上年届67岁的拾荒者黄月娴，控诉遭受年龄歧视，“面试十份工无一份有人请。”议员要求罗致光回应黄婆婆的情况，罗只称“佢可以揾劳工处协助就业”，黄婆婆闻言随即在座位上痛哭。工党张超雄批评罗的回应“冷酷无情”，质疑长者去找劳工处都不能解释长者贫穷问题，“有几多老人家好享受执纸皮？”罗再回应称，年纪较大的长者可找雇员再培训局转介工作，希望长者不要介意向外界求助。
以下全文转载黄月娴向立法会递交的发言稿。

主席你好，我叫黄月娴，今年67岁，系一位拾荒者，同时都有参与“拾平台”为拾荒者争取权益嘅工作。

我想从自己嘅遭遇嚟话畀啲政府听，长者出嚟揾嘢做有几困难，我哋老人家面对贫穷有时系好被动同埋无奈，社会支唔支持长者系好重要嘅。

我系一位已退休嘅低级公务员，每月攞得3,000蚊嘅退休金同攞综援系差唔多，一个人住喺公屋，交咗租同埋其他生活杂费之后，剩番嘅根本系要好悭好悭先至可以生存到，𠵱家喺香港生活水平咁高，如果我哋唔出嚟做嘢，根本系好难喺呢到生活。

喺几年前开始，我已经开始尝试揾嘢做，我唔系唔想揾，亦唔系唔想做，只系个社会对待我哋唔系咁友善，你哋又话鼓励长者就业，咁究竟做咗啲咩帮到我哋呢？我试过揾好多份工都食白果啊！

1）我试过打电话想去见两份诊所清洁嘅工，都冇咗音讯。

2）又去过见钟点工人，份工又要凑放学又要送饭要煮饭，但个工资系好低好平好剥削摆明系恰我哋老人家睇唔起我哋。

3）见过快餐店做侍应，𠮶一次我仲记得同另外一个后生啲嘅女人应征，我都想问个经理叫佢畀份表我填，问佢可唔可以请我，跟住佢攞咗份表嚟畀咗𠮶个女仔，对住我就一笑置之，唔理我行咗去，我喺到谂“使唔使咁呀！唔通我真系咁唔适合做嘢咩？”跟住我朋友同我讲：“唔通佢会话畀你听佢哋有年龄歧视咩！”

好多工都只系等电话冇回复嘅，若果考咗个保安牌就真系会请我咩？有啲老人家，好似我哋咁，本身又有长期病患嘅，身型又矮可能有啲仲有少少陀背嘅，其实啲雇主系会有选择㗎，唔系咁易请。

好啦，政府又话有啲做社会服务嘅工作，但系开嘅位都唔够我哋去做啦。就算有培训咁又点呢？始终太多基层嘅长者啦，根本职位都唔够供应。

我想建议政府不如谂下，好好规划长者就业嘅措施啦，畀多啲唔同工种嘅选择我哋，同啲雇主讲清楚，唔好年龄歧视。就算系粗重工作，都试下帮我哋改善下工作环境，友善啲、安全啲，可以令一班长者有尊严去做嘢。

𠵱家我哋净系来来去去都只系可以做洗碗啊、清洁工啊、执纸皮啊呢啲工，一个老人家去做好辛苦㗎，我哋根本冇得选择啊。阿局长你试下做下吖，又唔见你哋去做，点解净系要啲基层长者去做呢？

我哋可唔可以有更多嘅选择呢？又或者你想减低长者贫穷率，除咗系叫我哋做嘢，又可唔可以喺社会福利方面去谂呢？例如社区支援、整体嘅医疗系统支援、全民退休保障，系所有长者嘅权利，有基本嘅生活工资，收入好啲等等。

我哋喺香港做咗嘢四五十年，已经好攰，可唔可以令我哋过得有尊严，舒适啲嘅晚年生活，畀我哋呢班老人家呢？