【天文台科普】屋企唔觉冻出街先中伏　室温变化快慢全因石屎墙？

（原文取自天文台网页，大小标题、引言及内文，经过香港01编辑修订）

某个冷锋过境的早上，天气预报员和家人就该穿多少衣服讨论了一番。

预报员家人：收音机话今朝各区气温普遍比寻日低几度，跌到13、14度。但屋企跌温（瞄一瞄温度计）连两度都唔够，等我寻晚仲帮阿仔加咗好多衫、又加厚啲被瞓觉，焗亲佢添！

预报员：其实冷锋啱啱先过境，石屎建筑物温度反应比较慢，初时墙壁嘅深层仍然保存之前吸收嘅热能，慢慢释放出嚟，所以屋企通常会滞后一两日先明显跌温。

出门后

预报员家人：哗！刚才带阿仔返幼稚园，喺出面冻死我哋喇，我见有啲街坊甚至着羽绒外套添！

预报员：今日外面好大风，容易带走身体嘅热量，再加上多云同有雨，由于水嘅导热能力比空气高，落雨时喺身体附近嘅水点较容易令人体热量向外流失，所以感觉特别冷。

预报员家人：你又唔喺我出门口前讲？早知帮阿仔着多啲衫返学啦！

预报员：……

数天后室外气温回升

预报员家人：你又话气温开始回升，点解今朝起身屋企仲系凉浸浸？

预报员：道理很简单，记唔记得几日前讲过…

预报员家人：知啦知啦，又系同石屎有关嘛！

预报员：低温持续咗几日，墙壁嘅余热已经消耗。而石屎建筑物除咗散热慢，吸热亦较慢，视乎屋企坐向、通风情况、日照多少同室外温度上升速度，屋企升温通常会比室外滞后一两日，所以我哋喺室内仲会感到阵阵寒气。千祈唔可以掉以轻心，要确保阿仔喺屋企着够衫保暖呀！

预报员家人：原来系咁。我都要打电话提提六婶，佢行动不便，好多时间都留喺室内，一定要着够衫。

预报员：老人家身体热能容易流失，最冻𠮶日未必系最危险。由于发病情况有滞后现象，所以就算气温略有回升，我哋都要关心老人家嘅身体情况呀！

原文：着衫大作战

作者：香港天文台蔡瑞聪、郝孟骞