【职场】辞职应该好来好去，但唔等于要任人揾笨！

一年容易又跳槽，嚟到年尾，相信部份读者已经磨拳擦掌准备Send CV。想辞职想咗好耐，到真走𠮶吓都坚系爽，而关于辞职，你一定听过人讲：“出嚟做嘢要好来好去”，如果呢句嘢嘅意思系“临走唔好搞事”、“辞职都要做返好本身跟紧嘅嘢”、“未做完嘅野要整理好同好好交代”……咁我系完全同意！将心比己，我都希望隔离位同事辞职之时可以有责任心，将工作交带清楚，但系，做人要有责任心唔等于做人要有奴性或任人揾笨。你辞职时老板有无同你讲过啲好荒谬嘅建议，希望你同佢“好来好去”？

“辞职？系咪做到闷？比多啲嘢你做，求你唔好走吖！”

老板收到辞职信之后，只要个辞职者唔系一直对公司有害，多数都会叫佢入房倾倾试下留佢，另一方面，又除非你真系超帮得手，否则佢“留你”都只系例行公事，你唔洗太开心。点样知老板系真心留你定系例行工作？个答案真系好简单好肤浅，睇佢加唔加你人工就知。

曾经有个旧同事Jennifer，喺同一间公司做咗几年，日日的工作都系重重复覆，Jennifer觉得自己喺老板眼中系透明，无得试新嘢自然亦无机会上位，每年人工循例加2%，所以佢想衬后生想转环境。

交完辞职信，老板问Jennifer点解辞职，佢亦好坦白讲觉得工作无挑战性，感觉去到樽颈，日日返工都提唔起劲之类……老板一听到就好惊喜，离职系因为无挑战性？咁我比多啲挑战你咪得啰？嚟嚟嚟，其实公司都唔反对同事做多啲嘢，老板就叫Jennifer返屋企谂下有咩Project想做，谂完之后交份Proposal出嚟大家倾下点样可以做好佢！

老板……人哋而家唔想捞，个应对竟然系加Workload。

正所谓，后生仔要挨下，同埋唔好咁计较，你话觉得份工无咩上位机会，咁公司比嘢你做，即系比机会你啰，收咗机会仲想加人工？咁你咪享用咗双重优惠？餐厅Coupon都唔可以一餐用两张啦。

一个月后走？请你先完成三个月后嘅工作

倾完一轮，老板都只系用情感同真诚去留你，人工只字不提，到最后你唔接受，都系坚决辞职嘅话，当然佢都唔能够禁锢你，唯有叫你同HR计返清楚个离职日期啦。

而当老板知道你个离职日后，佢就会变得好忙，忙住叫人揾下未来三个月公司有乜嘢事会发生？有咩Task可以“先做未来事而唔洗先出未来粮”？老板绝对会尽佢最大能力希望迫使你一个月内做哂未来三个月嘅工作。至于交信𠮶时喺房倾𠮶啲情义、互相体谅，讲乜嘢如果你肯留低，以后会对你好啲乜乜乜……佢一出房门口就唔记得哂，你唔系咁傻咁天真有一丝信过𠮶翻说话呀？

当你返埋位谂下，咦，明明单嘢系隔离位同事Peter负责，而且件事系三个月后先发生，你交一交辞职信，老板突然将个波抛咗比你，仲同你讲：

“拍硬档，你走咗，嚟紧公司会好忙，惊啲同事会好辛苦，你而家尽量完成之后嘅嘢先。”

你真系从来都唔知道原来老板有担心过“同事会好辛苦”，而你亦谂唔明点解佢有呢种担心又唔自己解决，而你交比你——一个已辞职的人去解决，明明佢可以请人／加人工／减Workload去解决“同事好辛苦”，但佢无咁做到，佢选择叫你做哂所有嘢，做到元气尽伤地离职，因为你对佢嚟讲，即将毫无利用价值，就算你做到又病又残，都唔会影响到佢同公司。而最重要系佢相信你系一个有前途嘅打工仔，你一定会“好来好去”，帮得就帮。

好头好尾唔系唔好，但自己做人无底线，就唔好问点解成日比人恰。

（本文纯属作者意见，不代表香港01立场。）