【摄影情人】用镜头谈情　阳光加持　拍出恋爱中的惊喜

看他们的照片跟文字，我会形容像森林中的小鹿，偶然清新、感性，偶然神秘、跳脱。
Vani的Instagram里，大多是她自己和其他被摄的朋友们。而Zenith的Instagram里，几乎全是Vani跟一些景物。

虽然都是男友视觉，但Vani和Zenith所挑选的相，却有截然不同的感觉。做访问之先，因为不认识二人，于是把他们的Instagram（vanibusca／zenithsphere）从头看一遍。才发觉，Vani呈现的自己，是优雅文静的，在男友眼中，却多了一份搞怪可爱的感觉。

“影相对我嚟讲系舒缓压力。”

“透过摄影释放身体能量，好似放咗一场假咁，之后再返去自己嘅工作。”

从大学时期认识的二人，拍拖四年，他们平日最爱的活动就是“周围影”。“读书时期会一齐上摄影堂。一部digital、一部菲林，一人孭一部出去影，唔使用好多钱就可以玩一日，呢个拍拖模式唔错㖞。”Vani兴奋地分享。

未拍拖之前，二人早已对摄影感兴趣：“中学时无聊拎住部DC去公园影，其实过程已经好满足，可以capture到自己喜爱嘅事物。依家多咗平台放自己嘅摄影作品，如果其他人都钟意，就会更开心。”她亦笑言以前无拍拖，哪来的拍摄对象。对爱拍景物和死物的Zenith而言，拍拖后令他爱上拍摄人像：“以前好逃避影人，因为生活对得人太多，有时想抽离一下。拍拖之后觉得，发现好多时生活都离不开人，又想同女友之间有更多回忆同记录有趣嘅时刻，另一方面去留低自己嘅痕迹，慢慢钟意咗影人。”

“女仔对女仔嘅靓、角度、佢哋嘅执著可能系男生无嘅。”

“佢影女仔，其实系似女仔影女仔。”

摄影反映个性

大学时，一个修读视觉艺术，一个修读公关广告，访问时亦看得出端倪。Vani吱吱喳喳地分享的同时，Zenith却是默默的在聆听，待女友说完，才提出前一个话题的答案。摄影中反映个性？这是肯定的。“佢份人谂得比较周详，心思比较细密，要好有信心先会做。例如影人像要约一个人出嚟，如果未去到佢心目中好完美主义嘅影像，佢就未必会去影。我个人比较冲动，想试就试。可能咩都未谂，想要影一个人就去约。”两个爱摄影的人，互相欣赏之余亦会互相学习。“未识佢之前，唔觉得死物或者景物有咩特别。但佢对于世界经常性都好好奇，坐坐吓地铁，突然指著话呢度好靓，我望一望，心谂好靓咩？我成日经过㗎啦。跟佢影相多咗，发现唔系㖞，真系几得意。”Zenith补充：“影相系由心而发，如果刻意地做一件事，就未必系𠮶种感觉。”

他让我放下执著

有时候，即使同一个地方，跟不同的人、不同的阳光、不同的情绪，就会产生意想不到的效果。“好多时我哋会忽略咗好细微嘅事物，可能突然有道阳光加持，就好似发现了新大陆咁。而共同捕捉到美丽嘅一刻，呢个回忆喺属于我哋嘅。”Zenith在分享自己的摄影态度。自言较冲动和执著的Vani，指以前拍照都是有“目的性”，决定好这里，就要“死磨难磨”誓必拍到好照才肯摆休。相反，Zenith却喜爱从周遭发掘有趣的事。经几年时间的“调校”后，她终于学懂放下执著。她分享一次有趣的发现：“地下有一个被遗弃嘅维他水瓶，以前会心谂，行开啦，然后踢走佢。虽然佢只系一件垃圾，可能系人哋做完运动随意抛低。但配合埋阳光穿透嘅折射、剩低嘅水，夹埋嘅效果几靓。”

“有时对惯咗一个地方，你知道有所限制，唔会靓得去边。但外国人嚟，会觉得香港好有特色，影咗好靓嘅相。本地人先发觉，系㖞！好似几靓，然后去模仿。但其实系咪可以倒转，由我哋去寻找香港嘅美丽呢？”

对方眼中自己的美

摄影，就是将最美一瞬记录。问起最欣赏对方哪个角度的样子，Vani没有一刻犹豫：“我钟意佢微笑，佢嘅微笑比起其他男仔温暖。”藏不住笑容的Zenith却回应：“佢有讲过，虽然我唔系好明。”她继续分析：“男仔影相钟意打造一个型格同帅气嘅感觉，但有时顾住要型就会忽略咗自然嘅动态。有啲男仔一拎起部机就会chok样，而佢可以好自然咁笑。”至于拍摄女友可谓得心应手的Zenith则表示，“佢有时整蛊做怪嘅样，我都几钟意。我好钟意观察光线喺佢身上嘅感觉，透过影相嘅过程去观察佢。”

“别人钟意点定义，就由得人。最重要系相中见到自己，人哋见到就会知道系我影嘅。”

“我影嘅相，人哋未必觉得好生活化，但其实佢就系我嘅生活。”

定义文青

文青这个词，是别人给他们定义的。Vani定义他们只是爱摄影的人，“坊间被称为文青，通常系影小清新嘅，咁我哋嘅相色彩的确唔系好浓烈。我无特别去界定自己，如果定格自己，可能阻碍自己嘅推进。”如果用一种颜色去形容他们俩的Instagram，大概是“粉色”。自认有视觉“洁癖”的Vani，以前看不顺眼就会马上删照片。可现在，她却想尝试其他的色调。“其实最近色tone上有啲乱，想跳出自己嘅框框，除咗小清新同阳光，都想影吓夜景。”

情侣拍摄小分享

Vani笑言男友拍摄人像的技巧是经过四年训练出来的，“一开始我影佢或者佢影我，都好似影得好怪咁，未系好磨合到同熟悉对方。后来慢慢会发现，对方影出嚟系一个好自然嘅自己。”访问的最后，当然少不了让他们分享拍摄和被拍摄美照的心得，Vani立马搞笑“抛波”：“你讲先，系你专长！”

他们有以下的提议：

Zenith：“１）唔好太限制女朋友点样摆pose，例如个女仔唔适合做个pose，唔可以太过粗暴咁命令佢，好似好嫌弃佢做唔到要求。２）应该要多互动，只要互动得开心，自然会影到好嘅相出嚟。３）仲要多观察佢，如果不留意佢，就算摆出公认靓嘅pose，都影唔到啲咩。４）重点系培养情感，继而投放喺相入边。”

Vani：“可能每个人审美唔同，有啲男仔会钟意女仔摆定一个pose，觉得好可爱好正啊。佢同我影相嘅时候，我可能好刻意尝试做动作令张相靓啲，佢会话：‘唔使啦，自然啲得㗎啦！’我影人其实同佢有啲似，但未去到好似佢咁投放自己嘅感情，可能佢情感比较丰富。我注重捕捉自然神态，同整个画面嘅感觉。”

不刻意地“放闪”，纯粹地分享他们对生活的感受。或许，这就是照片充满吸引力的原因。