林子聪刘伟强片场撞鬼装香上摄影机　田启文买中鬼屋结局竟然系咁

Eric Kwok郭伟亮与刘浩龙主持的网络节目《圆桌得州扑克》（Round Table Poker）每集均会邀请娱圈名人担任嘉宾，边玩Poker边倾谈演艺经历与趣事。早前节目邀请到电影《少林足球》三位师兄弟出席节目，田启文、陈国坤与林子聪罕有合体亮相，与两位主持边分享香港电影影坛趣事，并由模特儿Angus张若锜担任性感荷官。

田启文买鬼屋畀鬼砸

节目中，电影监制田启文分享到一则灵异事件，他表示首次置业时，竟然从二手楼市场买到鬼屋，并有“畀鬼砸”的灵异经验。田启文表示：“无啦啦就畀……我哋叫‘畀鬼砸’，完全唔郁得。如是者咁样砸咗好耐，我话究竟系男定系女嚟呢？”陈国坤随即笑指：“女嚟嘅就冇所谓啦！”田启文续指：“咁我又冇刻意问啲师傅，咁又唔见佢搞我，咁咪由佢啰！”

田启文更表示，自己曾问缠绕在家中的鬼“攞冧把”买六合彩，田启文笑指事件其实颇“阴公”，他表示：“系真系报梦咁嘅，佢报咗三个字，咁我咪走去买六合彩，攞10蚊走去买，攞10蚊走去买就中咗100蚊。”然后他便用赢来的100蚊再买六合彩：“然后我再用𠮶三个字走去买，写咗10张、拖唔同冧把，买到最尾𠮶张又买唔到，剩系买咗9张。咁谂住攞返个本，咁一对，一张中咗三奖，然后几张系中咗其他，冇买𠮶张系中头奖。”但田启文表示当时六合彩数字比现今少，而彩池亦相对没有现今的庞大，头奖其实亦只有三十多万。

最后，被问及鬼魂的下落时，田启文表示有一位朋友到他家中借宿一宵：“咁半夜我听到佢喺到鬼杀咁嘈，我以为佢发开口梦啦，我又冇嘢、咁就继续瞓啦！第二日朝头早起身，我话‘你做乜鬼寻晚喺到半夜喺到嘈？’跟住佢就即刻弹起身话‘你屋企有嘢啊！’我都唔记得咗啊！然后佢话佢（鬼魂）踩佢，然后佢就醒，跟住佢识法（法术）就打，就灭咗佢！”田启文表示原来朋友懂得茅山法术，然而自己对朋友的技术却一直不知情。

刘伟强对摄影机上香

提到灵异事件，林子聪亦提到参与某次拍摄的经历：“我就试过一次，部机唔郁，拍菲林Roll极都Roll唔到，一Roll就停，又唔系冇电、咩都Check过晒都冇事。咁刘伟强（导演/摄影师）就讲句粗口先，然后返转头，唔好拍！然后叫个助手装香。咁我哋就‘装香？装咩呢？’装喺佢部机到啊！插喺部机到啊！跟住插咗落去一阵间Roll到喇！乜都冇搞过！”表示类似的拍摄灵异事件，自己也仅遇过一次。